రజనీకాంత్ కథానాయకుడిగా నటిస్తున్న చిత్రం 'అన్నాత్తే'. శివ దర్శకత్వం తెరకెక్కుతున్న ఈ సినిమాలో తెలుగు నటుడు జగపతిబాబు ఓ కీలకపాత్ర కోసం ఎంపికయ్యారు. ఇదే విషయాన్ని చిత్ర నిర్మాణ సంస్థ ట్విటర్‌లో పేర్కొంది. బుధవారం నుంచి జరుగుతోన్న షూటింగ్లో రజనీకాంత్, జగపతిబాబు మధ్య కొన్ని సన్నివేశాలను తెరకెక్కిస్తున్నారు.
జగపతిబాబు తమిళ సినిమాల్లో నటించడం కొత్తేమీ కాదు. గతంలో ఆయన రజనీకాంత్‌తో కలిసి 'కథానాయకుడు', 'లింగ' చిత్రాల్లో నటించారు.
గతేడాది డిసెంబర్‌లో షూటింగ్‌ను తిరిగి మొదలు పెట్టినా.. కరోనా కారణంగా చిత్రీకరణ వాయిదా పడింది. ప్రస్తుతం చెన్నైలో సినిమాలోని కొన్ని కీలక సన్నివేశాలు తెరకెక్కిస్తున్నారు. కళానిధి మారన్‌ సమర్పణలో సన్‌ పిక్చర్స్ పతాకంపై నిర్మితమవుతోన్న ఈ చిత్రంలో నయనతార, కీర్తి సురేశ్, మీనా, ఖుష్బూ, ప్రకాశ్ రాజ్, రోబో శంకర్‌ తదితరులు నటిస్తున్నారు. డి.ఇమ్మాన్‌ సంగీత స్వరాలు అందిస్తోన్న ఈ సినిమా నవంబర్‌ 4, 2021 దీపావళికి ప్రేక్షకులు ముందుకు తీసుకురానున్నారు.