"ఆంధ్రప్రదేశ్‌లో తెలుగు చిత్ర పరిశ్రమ అభివృద్ధి చెందడమే ప్రభుత్వ లక్ష్యం. అందుకే చిత్రీకరణలకు నేరుగా అనుమతుల్ని ఇచ్చి ప్రోత్సహించనున్నాం. పరిమిత వ్యయంతో తెరకెక్కే సినిమాలను వారం రోజులపాటు థియేటర్లలో ప్రదర్శించుకునేలా తగిన ఏర్పాట్లు చేయబోతున్నాం" అన్నారు ఆంధ్రప్రదేశ్‌ చలన చిత్ర, టెలివిజన్‌, నాటక రంగ అభివృద్ధి సంస్థ (ఎ.పి.ఎఫ్.డి.సి) ఛైర్మన్ విజయచందర్. బుధవారం హైదరాబాద్‌లో విలేకర్లతో మాట్లాడిన ఆయన పలు విషయాలను పంచుకున్నారు.
"నన్ను ఎఫ్.డి.సి ఛైర్మన్ చేస్తానని వై.ఎస్‌.రాజశేఖర్‌రెడ్డి ఇచ్చిన మాటను ఇప్పుడు వై.ఎస్‌.జగన్‌మోహన్‌రెడ్డి నెరవేర్చారు. సినిమా రంగానికి చెందిన అందరినీ కలుసుకుని, ఏపీలో చిత్ర పరిశ్రమ అభివృద్ధి కోసం ప్రణాళికలు సిద్ధం చేస్తా. జగన్‌మోహన్‌ రెడ్డికి చిన్నప్పట్నుంచీ సినిమాలంటే ఇష్టం. ఒకప్పుడు ఆయన అభిమాన హీరో బాలకృష్ణ. ఆయన సినిమాలు విడుదలవుతుంటే ఊళ్లో సంబరాలు జరుపుకునేవారు. హీరో సుమంత్‌, జగన్ కలిసి చదువుకున్నారు. అలా చిత్ర పరిశ్రమతో అనుబంధమున్న జగన్ ఆ రంగ అభివృద్ధి కోసం సహాయం అందించేందుకు సిద్ధంగా ఉన్నారు. చిత్రీకరణల కోసం ఎలాంటి వసతుల్ని సమకూర్చడానికైనా, పరిశ్రమ కోసం స్థలాలు కేటాయించడానికైనా ప్రభుత్వం సిద్ధంగా ఉంది."
-విజయచందర్, ఎఫ్.డి.సి ఛైర్మన్