హీరోయిన్ ప్రాధాన్యమున్న చిత్రాలతో రెండో ఇన్నింగ్స్లో అదరగొడుతోంది నటి జ్యోతిక. ఆమెతో పాటు రేవతి ప్రధాన పాత్రల్లో నటించిన చిత్రం 'జాక్పాట్'. ఈ సినిమా తెలుగు ట్రైలర్ను శనివారం విడుదల చేశారు. వైవిధ్య నటనతో కామెడీ పండిస్తూ కొత్తగా కనిపించారు జ్యోతిక, రేవతి. హీరో సూర్య ఈ చిత్రానికి నిర్మాత.
పోలీసు, వైద్యులు గెటప్పుల్లో కనిపిస్తూ సందడి చేశారు జ్యోతిక-రేవతి. రౌడీలను జ్యోతిక కొట్టినప్పుడు.. 'ఎవరు మీరు ఎందుకు నన్నిలా టార్చర్ పెడుతున్నారు' అని అడుగుతాడు విలన్. చంద్రముఖి స్టైల్లో 'మీకు గుర్తు రావట్లేదా'?.. అని ఆమె అనడం వీక్షకులకు నవ్వు తెప్పిస్తోంది. 'ఒక మగధీరుడు, బాహుబలి, బాద్షా...' అంటూ ప్రతినాయకుడ్ని జ్యోతిక బెదిరించటం వంటివి సినిమాపై అంచనాల్ని పెంచుతున్నాయి.