కరోనా సంక్షోభం కచ్చితంగా సినీపరిశ్రమపై ప్రభావం చూపుతుందని అన్నాడు బాలీవుడ్ దర్శక, నిర్మాత అనురాగ్ బసు. లాక్డౌన్ ముగిసినా సినిమాహాళ్లకు ప్రేక్షకులు రావటమనేది ప్రశ్నార్థకంగా మారిందన్నాడు.
ప్రేక్షకులు రావటం కష్టమే..
ప్రస్తుతం కరోనాకు ముందు-తర్వాత అనే విధంగా చిత్రపరిశ్రమ పరిస్థితి మారిందని అభిప్రాయం వ్యక్తం చేశాడు అనురాగ్. సినిమాలు సరాసరి ఆన్లైన్ ఫ్లాట్ఫాంలలో విడుదల చేయటమనే కొత్త సంప్రదాయంతో.. నిర్మాతలకు అపారనష్టం వాటిల్లుతుందని విచారం వ్యక్తం చేశాడు. ఈ విరామంలో ప్రేక్షకుడి అభిరుచి కూడా మారే అవకాశం ఉందన్నాడు.
లాక్డౌన్ తర్వాత ప్రజలు థియేటర్లకు రావటమనేది అనుమానంగా మారిన క్రమంలో.. నిర్మాతలంతా వారి వారి చిత్రాల విడుదల ప్రణాళికలను రూపొందించుకోవాల్సి ఉంటుందన్నాడు. ఈ నిర్బంధంతో చిత్రపరిశ్రమకు అపారనష్టం వాటిల్లడం సహా పలువురు సినీకార్మికులు ఆర్థిక సమస్యలు ఎదుర్కొంటున్నారని అభిప్రాయపడ్డాడు.
అనురాగ్ బసు దర్శకత్వంలో రూపొందిన కామెడీ చిత్రం 'లూడో' ఏప్రిల్ 24న విడుదల కావాల్సింది. కానీ, కరోనా లాక్డౌన్ కారణంగా రిలీజ్ వాయిదా పడింది. ఈ చిత్రంలో అభిషేక్ బచ్చన్ ప్రధానపాత్ర పోషించగా.. రాజ్కుమార్ రావు, ఫాతిమా సనా, ఆదిత్య రాయ్ కపూర్, సన్యా మల్హోత్రా, రోహిత్, పంకజ్ త్రిపాఠి నటించారు.
ఇదీ చూడండి.. బన్నీ-సుకుమార్ సినిమాలో బాలీవుడ్ బ్యూటీ!
