దక్షిణాది చిత్రసీమపై కథానాయికగా బలమైన ముద్ర వేసింది సమంత. ఈ మధ్య ఎక్కువగా హీరోయిన్ ఓరియెంటెడ్ చిత్రాల్ని చేస్తూ నటనలో మంచి గుర్తింపు తెచ్చుకుంటోంది. ఇటీవల విడుదలైన 'ఓ బేబీ' సినిమా అందుకు నిదర్శనంగా నిలిచింది. ప్రస్తుతం కథల్ని ఎంచుకోవడంలో ఆచితూచి అడుగులేస్తోంది సామ్. తన అనుభవం, స్థాయికి తగ్గ కథలకు ప్రాధాన్యం ఇస్తోంది.
చిత్రసీమలో నాయికా ప్రాధాన్యమున్న సినిమాలు తరచూ రావడం కష్టమే. ఈ తరహా మూవీలు చేస్తున్న కథానాయికలు అనుష్క, నయనతార తదితరుల నుంచి సమంతకు గట్టి పోటీ ఉంది. అందుకే సామ్ ప్రత్యామ్నాయాల్ని అన్వేషిస్తోంది. ఒకవైపు వెబ్ సిరీస్ల్లో నటిస్తూనే, మరికొన్ని కొత్త ప్రయత్నాలు చేస్తోందీ ముద్దుగుమ్మ. అందులో భాగంగానే సమంత నిర్మాతగా మారబోతోందని సినీ వర్గాల్లో వినిపిస్తోంది.