Senthil Kumar Interview: రాజమౌళి కల కంటే.. ఆ కలని తన కెమెరా కళ్లతో మొట్ట మొదట చూసే వ్యక్తి సెంథిల్‌ కుమార్‌. అగ్ర దర్శకుడు రాజమౌళి.. ఛాయాగ్రాహకుడు సెంథిల్‌ ప్రయాణం 'సై' నుంచి కొనసాగుతోంది. వీరిద్దరి కలయికలో 'ఛత్రపతి', 'యమదొంగ', 'మగధీర', 'ఈగ', 'బాహుబలి' చిత్రాలొచ్చాయి. ఈ నెల 25న ప్రేక్షకుల ముందుకొస్తున్న 'ఆర్ఆర్ఆర్'కీ సినిమాటోగ్రఫీ బాధ్యతలు నిర్వర్తించారు సెంథిల్‌. ఈ సందర్భంగా ఆయనతో ‘ఈనాడు సినిమా’ ప్రత్యేకంగా ముచ్చటించింది.
'ఆర్ఆర్ఆర్' ఎలాంటి అనుభవాన్నిచ్చింది?
RRR Release: ఈసారి కరోనా వల్లే ఇంత సుదీర్ఘమైన ప్రయాణం చేయాల్సి వచ్చింది. 'ఆర్ఆర్ఆర్' ఓ కొత్త రకమైన అనుభవాన్నిచ్చింది. ఇద్దరు అగ్ర తారలతో కలిసి పనిచేయడం నాకూ ఇదే తొలిసారి. ఎన్టీఆర్‌, రామ్‌చరణ్‌... ఇద్దరిలోనూ ఉత్సాహం ఎక్కువే. ఒకే ఫ్రేమ్‌లో దృష్టి ఎవరిపై పెట్టాలో అర్థమయ్యేది కాదు.
'బాహుబలి'తో పోలిస్తే ఇది ఏ రకమైన సవాళ్లనిచ్చింది?
Bahubali Movie: 'బాహుబలి' పూర్తిగా ఫాంటసీ. రాజుల కాలాన్ని ప్రతిబింబించే కథ. మన ఊహలకి తగ్గట్టుగా సాగుతుంది తప్ప.. ప్రత్యేకంగా ఆ కాలంలో ఎలా ఉండేదో ఎవ్వరికీ తెలియదు. దాంతో పోలిస్తే 'ఆర్ఆర్ఆర్' వేరు. 1920లనాటి కథ. ఆ కాలానికి సంబంధించి మన దగ్గర చాలా ఫొటోగ్రాఫ్స్‌, డాక్యుమెంటరీలతోపాటు ఇతరత్రా రెఫరెన్స్‌లు అందుబాటులో ఉంటాయి. అందుకు తగ్గ వాతావరణం పక్కాగా తెరపై చూపించాలి. ఆ క్రమంలో సినిమాటిక్‌ లిబర్టీని ఏ మేరకు తీసుకోవాలి? ఎంత తీసుకోవద్దో ఆలోచిస్తూ పనిచేయాల్సి వచ్చింది. 'బాహుబలి' విజువల్‌ గ్రాండియర్‌ సినిమా. 'ఆర్ఆర్ఆర్' భావోద్వేగాలతో కూడిన ఓ యాక్షన్‌ డ్రామా. భావోద్వేగాల పరంగా లోటుపాట్లు లేకుండా.. విజువల్‌గా ఎంత ప్రభావం చూపించగలమనేది ఈ చిత్ర విషయంలో మాకెదురైన మరో అతి పెద్ద సవాల్‌.
ఇందులో కొన్ని సన్నివేశాల గురించి రాజమౌళి, ఎన్టీఆర్‌ ప్రత్యేకంగా ప్రస్తావించారు. వాటిపై మీ అభిప్రాయమేమిటి?
అదొక గొప్ప అనుభవం. ఒకొక్క జంతువు ఒక్కో రకంగా గెంతుతుంది, ఒక్కో రకంగా పరిగెత్తుతుంది. వాటి వేగానికి తగ్గట్టుగా ప్రత్యేకంగా లైటింగ్‌ చేసుకుని సన్నివేశాల్ని తెరకెక్కించాం. హాలీవుడ్‌ బడ్జెట్‌తో మనం పోల్చుకోలేం. మన పరిధిలో తీసినా నాణ్యత పరంగా ఎక్కడా తగ్గకూడదని ఏం చేయాలో అదంతా చేశాం. యారీ ఎల్‌.ఎఫ్‌ కెమెరాని తొలిసారి మన దేశంలో ఈ సినిమా కోసమే వాడాం. కాకపోతే మా చిత్రీకరణ ఆలస్యమైంది కాబట్టి ఆ కెమెరాతో తీసిన ఒకట్రెండు సినిమాలు విడుదలయ్యాయి. మన దేశంలో తెరలు లేవు కానీ.. దీన్ని డాల్బీ విజన్‌లో విడుదల చేస్తున్నాం. భారతీయ ప్రేక్షకులు ఇప్పటిదాకా డాల్బీ ఆట్మాస్‌లో శబ్దాల్నే ఆస్వాదించారు. డాల్బీ విజన్‌ క్వాలిటీ గురించి తెలియదు. దీన్ని విజన్‌కి తగ్గట్టుగా తీశాం. జననీ పాటని చూస్తే త్రీడీ తరహాలో కనిపించేలా విజువల్స్‌ని సృష్టించాం.