మెగాస్టార్ చిరంజీవి నటన 'సైరా' సినిమాని మరోస్థాయికి తీసుకెళ్లిందని అభిప్రాయపడ్డాడు టాలీవుడ్ ప్రిన్స్‌ మహేశ్‌బాబు. ఉయ్యాలవాడ నరసింహారెడ్డి జీవితం ఆధారంగా తెరకెక్కిన చిత్రమిది. రామ్చరణ్ నిర్మించిన ఈ చిత్రానికి సురేందర్ రెడ్డి దర్శకత్వం వహించాడు. అక్టోబర్‌ 2న చిత్రం ప్రేక్షకుల ముందుకు వచ్చింది. ఈ సినిమాపై ప్రముఖులు ప్రశంసల జల్లు కురిపిస్తున్నారు.
ప్రతిఒక్కరూ తప్పక చూడాల్సిన చిత్రం 'సైరా'. ఈ సినిమాలో విజువల్స్, నిర్మాణ విలువలు ఒక ఎత్తయితే చిరంజీవి నటన సినిమాని మరోస్థాయికి తీసుకెళ్లింది. రామ్చరణ్, సురేందర్‌రెడ్డికి కంగ్రాట్స్. 'సైరా'ని చాలా అద్భుతంగా చిత్రీకరించిన... సినిమాటోగ్రాఫర్‌ రత్నవేలుకి ప్రత్యేక అభినందనలు. ఇటీవల కాలంలో నేను చూసిన అద్భుతమైన విజువల్స్ ఇవి.
- మహేశ్‌ బాబు, సినీ హీరో
"నేను దక్షిణ కొరియాలో ఉన్నాను. అందుకే 'సైరా' చిత్రం చూడటం కుదరలేదు. కానీ టాక్‌ నా వరకు వచ్చింది. ఇండియాలో బాక్సాఫీస్‌ ఘరానా మొగుడు మళ్లీ వచ్చేశాడని అంటున్నారు. ఇక్కడ నుంచే చిరంజీవి సర్‌కు నా హగ్."
- నాని, సినీ హీరో
'మెగాస్టార్' ఈ ఒక్కపేరు నేను పెద్దవాడిని అనే విషయాన్ని మర్చిపోయేలా చేసింది.. నన్ను చిన్నపిల్లాడిని చేసేసింది. సంతోషంతో కన్నీళ్లు వచ్చేస్తున్నాయి. నన్ను నేను మర్చిపోయేలా చేసినందుకు థాంక్యూ మెగాస్టార్. 'సైరా నరసింహారెడ్డి' ఇచ్చిన కొణిదెల ప్రొడక్షన్కు థాంక్యూ అనేది చాలా చిన్న పదం.
- సాయిధరమ్‌ తేజ్‌, సినీ హీరో
"నేను చిరంజీవి అభిమానిని అయినందుకు చాలా సంతోషిస్తున్నాను. సైరాలో ప్రతి సన్నివేశం చాలా బాగుంది. స్వాతంత్య్ర సమరయోధుడి జీవితాన్ని చాలా అద్భుతంగా చిత్రీకరించారు. సినిమాలోని ప్రతి ఒక్కరు చాలా బాగా నటించారు."
- వరుణ్‌ తేజ్‌, సినీ హీరో
ఎమోషన్స్, అనుభవానికి సైరా నర్సింహారెడ్డి పెద్ద పీట వేశారు. మెగాస్టార్ ఫెర్ఫార్మెన్స్ అద్భుతం. సురేందర్ రెడ్డి చరిత్రను వెండితెర మీద అద్భుతంగా ఆవిష్కరించారు. నటీనటుల ప్రదర్శన ఎంత రిచ్‌గా ఉందో రాంచరణ్ ప్రొడక్షన్ విలువలు అంతే రిచ్‌గా ఉన్నాయి.
- సుధీర్ బాబు, సినీ హీరో