'ఆచార్య' చిత్రం తర్వాత చిరంజీవి ఏ సినిమా చేయనున్నారు? - ఈ ప్రశ్నకి సమాధానం తెలియాలంటే మరికొన్నాళ్లు ఆగాల్సిందే. ముగ్గురు దర్శకులకు చిరంజీవి పచ్చజెండా ఊపారు. వాళ్లంతా ఇప్పుడు స్క్రిప్టు పనులతో బిజీ బిజీగా ఉన్నారు. మెహర్ రమేశ్ దర్శకత్వం వహిస్తున్న ఓ సినిమా కోసం ఏర్పాట్లు చకచకా సాగుతున్నాయి. తమిళంలో విజయవంతమైన 'వేదాళం' చిత్రానికి రీమేక్‌గా ఆయన ఈ సినిమా రూపొందించనున్నారు.
'ఆచార్య' తర్వాత 'వేదాళం' రీమేక్ పట్టాలెక్కుతుందా?
మెగాస్టార్ చిరంజీవి తాను తర్వాత చేయబోతున్న ప్రాజెక్టుల గురించి ఇదివరకే ప్రకటించారు. కానీ ఏ సినిమా ముందు పట్టాలెక్కుతుందో అనే విషయంపై మాత్రం స్పష్టత ఇవ్వలేదు. అయితే మెహర్ రమేశ్ దర్శకత్వంలో 'వేదాళం' రీమేక్కు చకచకా పనులు జరిగిపోతున్నాయని సమాచారం.
'ఆచార్య' తర్వాత 'వేదాళం' రీమేక్ పట్టాలెక్కుతోందా?
ఈ చిత్రాన్ని ఏకే ఎంటర్‌టైన్‌మెంట్స్‌ సంస్థ నిర్మించబోతోంది. స్వరాలు సమకూర్చే బాధ్యతని మణిశర్మ తనయుడు మహతి స్వరసాగర్‌కు అప్పజెప్పినట్టు సమాచారం. త్వరలోనే ఈ సినిమా ప్రకటన వెలువడే అవకాశాలున్నాయి. ఇందులో సాయిపల్లవి ఓ కీలక పాత్ర చేస్తున్నట్టు తెలుస్తోంది. చిరంజీవి ఇటీవల గుండుతో కనిపించారు. అది ఈ సినిమా మేకప్‌ టెస్ట్‌ల్లో భాగమే అని పరిశ్రమ వర్గాలు అంటున్నాయి.