'ఓటీటీలు స్వీయ నియంత్రణ పాటించాల్సిందే'

ఓటీటీ సంస్థలు స్వీయ నియంత్రణ నిబంధనలు రూపొందించుకోవాలని కేంద్ర ప్రభుత్వం ఆదేశించింది. ఓటీటీలో ప్రసారమయ్యే చిత్రాలు, వెబ్​సిరీస్​లను పర్యవేక్షించుకోవాలని.. లేకపోతే తామే చర్యలు తీసుకోవాల్సి వస్తుందని హెచ్చరించింది.

నెట్ ఫ్లిక్స్, అమెజాన్ ప్రైమ్ వంటి ఓటీటీ సంస్థలు స్వీయ నియంత్రణ నిబంధనలు రూపొందించుకోవాలని కేంద్ర ప్రభుత్వం ఆదేశించింది. సెన్సార్ బోర్డ్, ప్రెస్ కౌన్సిల్ ఆఫ్ ఇండియా, వార్తాపత్రికలు, టీవీ న్యూస్ ఛానల్స్ వంటి సంస్థలు రూపొందించుకున్నట్లుగా ఓటీటీలు కూడా స్వీయ నియంత్రణ కలిగి ఉండాలని స్పష్టం చేసింది. లేకపోతే తామే చర్యలు తీసుకోవాల్సి వస్తుందని హెచ్చరించింది.

ఓటీటీలో ప్రదర్శించే చిత్రం లేదా వెబ్ సిరీస్‌ను పర్యవేక్షించుకోవాలని సదరు సంస్థలకు తెలిపింది. తద్వారా ప్రభుత్వం ఈ అంశంలో జోక్యం చేసుకోవలసిన అవసరం ఉండదని స్పష్టం చేసింది.

"ఓ ఓటీటీ ప్లాట్‌ఫామ్‌ లో.. కొత్తగా వచ్చిన చిత్రం 'తాండవ్‌' దేశంలో కలకలం రేపుతోంది. ఆ చిత్రంలో అభ్యంతరకర సన్నివేశాలు, మాటల పట్ల.. చాలా సంస్థలు తమ అసంతృప్తిని వ్యక్తం చేశాయి. చిత్రాన్ని నిషేధించాలని సమాచార, ప్రసార మంత్రిత్వ శాఖను సంప్రదించాయి. ఇలాంటి చిత్రాల ప్రదర్శనలో ఓటీటీలు స్వీయ పరిశీలన చేసుకోవాలి. అంతేకాకుండా స్వీయ నియంత్రణ నిబంధనలను రూపొందించుకోవాలి."

-కేంద్ర ప్రభుత్వం

ఓటీటీ ప్లాట్‌ఫాంలలో వస్తున్న ఫిల్మ్, వెబ్ సిరీస్‌కు సంబంధించిన కేసులు కొన్ని రోజులుగా, హైకోర్టుల నుంచి సుప్రీం కోర్టు వరకు విచారణకు వస్తున్నాయని కేంద్ర సమాచార ప్రసారాల మాంత్రిత్వ శాఖ తెలిపింది. కాగా ఓటీటీలో వస్తోన్న అశ్లీల చిత్రాలను అరికట్టడానికి మార్గదర్శకాలను రూపొందించాలని ప్రభుత్వానికి ఇటీవల దిల్లీ హైకోర్టు సూచించిన విషయాన్ని గుర్తుచేసింది.

అమెజాన్​ ప్రైమ్​కు సమన్లు..

అమెజాన్​ ప్రైమ్​ వీడియో ప్లాట్​ఫాంకు సమన్లు జారీ చేసింది కేంద్ర సమాచార, ప్రసారాల మంత్రిత్వ శాఖ. 'తాండవ్'​ చిత్రం వివాదం నేపథ్యంలో వివరణ ఇవ్వాలని ఆదేశించింది.

ఇదీ చూడండి:ఏకాంత చిత్రాలు.. వీడియోలతో భర్త వేధింపులు