ముద్దుగుమ్మ ఆలియా భట్ టైటిల్ రోల్లో నటిస్తున్న చిత్రం 'గంగూభాయ్'. సంజయ్లీలా భన్సాలీ దర్శకత్వం వహిస్తున్న ఈ సినిమా షూటింగ్ ప్రారంభమైంది. ఈ విషయాన్ని వెల్లడించిన చిత్రబృందం.. సెప్టెంబరు 11న ప్రేక్షకుల ముందుకు తీసుకొస్తున్నట్లు ప్రకటించారు. 'పద్మావత్' తర్వాత భన్సాలీ తీస్తున్న చిత్రమిది.
ఓ వేశ్య జీవితం ఆధారంగా
ఓ వేశ్య గృహం యజమాని గంగుబాయి కతియావాడి అనే మహిళ జీవితం ఆధారంగా ఈ సినిమా తీస్తున్నారు. ఒకప్పుడు వ్యభిచార గృహాన్ని నిర్వహిస్తూ.. అక్కడున్న బడాబడా నాయకుల పరిచయాలతో పవర్‌ఫుల్‌ మహిళగా చక్రం తిప్పింది. చివరి రోజుల్లో తన వేశ్య వృత్తిని వదిలేసి, అక్కడి సెక్స్‌ వర్కర్ల అభ్యున్నతి కోసం ఎంతో కృషి చేసింది. ఎందరో జీవితాల్లో కొత్త వెలుగులు నింపింది. ఇప్పుడీ స్ఫూర్తిదాయక మహిళ పాత్రనే ఆలియా పోషించనుంది.
మరి ఈ పాత్రలో ఆలియా ఎలా ఒదిగిపోతుంది. తెరపై ఈ జీవితగాథను భన్సాలీ ఎలా ఆవిష్కరించబోతున్నారో తెలియాలంటే వచ్చే ఏడాది వరకు ఆగాల్సిందే. ఆలియా.. ఈ చిత్రంతో పాటు రాజమౌళి 'ఆర్‌ఆర్‌ఆర్‌'లో, 'బ్రహ్మాస్త్ర'లో రణ్‌బీర్ కపూర్ సరసన నటిస్తోంది.