Chandrayaan 3 ILSA :చంద్రుడిపై చంద్రయాన్-3 ల్యాండర్, రోవర్ పేలోడ్లు శాస్త్రీయ పరిశోధనలు సాగిస్తున్నాయి. జాబిల్లి ఉపరితలంపై ఉష్ణోగ్రతల వివరాలు, సల్ఫర్ వంటి మూలకాల లభ్యత సమాచారాన్ని ఇప్పటికే చేరవేశాయి. ఈ క్రమంలోనేవిక్రమ్‌ ల్యాండర్లో ఉన్న 'ఇన్‌స్ట్రుమెంట్‌ ఫర్‌ లూనార్‌ సిస్మిక్‌ యాక్టివిటీ- ILSA' పేలోడ్.. తాజాగా చంద్రుడిపై సహజ ప్రకంపనలను నమోదు చేసింది. ఈ మేరకు ఇస్రో సోషల్ మీడియా వేదిక ఎక్స్లో వెల్లడించింది.
Chandrayaan 3 Lander Findings : చంద్రయాన్-3 ల్యాండర్‌లోని 'ఇల్సా' పేలోడ్.. జాబిల్లి ఉపరితలంపై రోవర్, ఇతర పేలోడ్‌ల కారణంగా ఏర్పడిన ప్రకంపనలు నమోదు చేసింది. దీంతోపాటు చంద్రుడి ఉపరితలంపై సహజంగా ఏర్పడినట్లు భావిస్తున్న ప్రకంపనలను కూడా గుర్తించింది. ఆగస్టు 26న వాటిని నమోదు చేసింది. వాటి మూలాన్ని గుర్తించే దిశగా అన్వేషణ కొనసాగిస్తోంది. మరోవైపు 'ఇల్సా' పేలోడ్.. చంద్రుడిపై మొట్టమొదటి మైక్రో ఎలక్ట్రో మెకానికల్ సిస్టమ్స్- MEMS సాంకేతిక ఆధారంగా రూపొందించిన పరికరం అని ఇస్రో వెల్లడించింది. 'ఇల్సా' పేలోడ్‌ను 'లేబొరేటరీ ఫర్‌ ఎలక్ట్రో- ఆప్టిక్స్‌ సిస్టమ్స్' రూపొందించిందని తెలిపింది. దాన్ని చంద్రుడి ఉపరితలంపై మోహరించే యంత్రాంగాన్ని యూఆర్ రావు శాటిలైట్ సెంటర్ అభివృద్ధి చేసిందని తెలిపింది.
'రోవర్ సవ్యంగానే పనిచేస్తోంది'
Chandrayaan 3 Rover Updates :చంద్రుని ఉపరితలంపై అడుగుపెట్టిన ప్రగ్యాన్ రోవర్ సవ్యంగా పనిచేస్తున్నట్లు.. ఇస్రో ఛైర్మన్ ఎస్.సోమ్‌నాథ్‌ తెలిపారు. 14రోజులవరకు మిషన్‌ విజయవంతంగా పూర్తవుతుందని ఆశిస్తున్నట్లు చెప్పారు.