నాన్వెజ్ ప్రియులకు చికిన్, మటన్ తిని బోరు అనిపించినప్పుడు.. వారి దృష్టి చేపలమీదకు వెళ్తుంది. చేపలతో పులుసు, వేపుడు సహా పలు రకాల వంటకాలు చేసుకోవచ్చు. అయితే కాస్త వెరైటీగా చేయాలనుకున్నప్పుడు.. ఏం చేయాలో ఒక్కోసారి తెలియదు. అందుకే ఈ 'చేప ఉండల మామిడి పులుసు'ను ఈ సారి ట్రై చేయండి.
కావాల్సినవి
బోన్లెస్ చేపముక్కలు, ఉప్పు, పసుపు, కారం, వెల్లుల్లి, అల్లం, పచ్చిమిర్చి, వేయించిన ఉల్లిపాయలు, పచ్చికోడిగుడ్డు, ధనియాలు, మెంతులు, ఎండుమిర్చి, జీలకర్ర, కొత్తిమీర, చింతపండు.
తయారీ విధానం
ముందుగా ఓ బేసిన్లో బోన్లెస్ చేపముక్కలు, ఉప్పు, పసుపు, కారం, వెల్లుల్లి ముక్కలు, అల్లం ముక్కలు, పచ్చిమిర్చి, వేయించిన ఉల్లిపాయలు, పచ్చికోడిగుడ్డు వేసి బాగా రుబ్బుకోవాలి. అలాగే ధనియాలు, మెంతులు వేయించి.. పొడి చేసుకుని పక్కన పెట్టుకోవాలి.
తర్వాత గిన్నెలో నూనె వేసి అందులో ఆవాలు, జీలకర్ర, వెల్లుల్లి, ఎండుమిర్చి, కరివేపాకు, ఉల్లిపాయలు వేసి, కాస్త వేగిన తర్వాత పల్చగా కోసుకున్న మామిడికాయ ముక్కలు, నానబెట్టిన వెండిమిర్చి పేస్ట్, చింతపండు పులుసు వేసి ఐదు నిమిషాలు మగ్గించి.. తగినన్ని నీళ్లు, ముందుగా చేసుకున్న మసాలా పొడి వేసి ఒక ఉడుకు వచ్చేదాక వేడి చేయాలి. తర్వాతా ముందుగా రుబ్బుకున్న చేపల మిశ్రమాన్ని ఉండలాగా చేసి.. ఉడుకుతున్న మిశ్రమంలో వేసి 10 నిమిషాలు ఉడికించాలి. ఆ పులుసును దించే ముందు.. పైన కొత్తిమీర జల్లుకుంటే.. చేప ఉండల మామిడి పులుసు రెడీ.
