ఈ లస్సీలు తాగితే క్షణాల్లో కూల్ అవ్వాల్సిందే!

కాలంతో సంబంధం లేకుండా చాలామంది ఇష్టపడే డ్రింక్స్‌లో లస్సీ కూడా ఒకటి.. పెరుగు మన ఆరోగ్యానికి మంచి చేయడమే కాకుండా పోషకాలను కూడా అందిస్తుంది. అందుకే చాలామంది కూల్‌డ్రింకులకు బదులుగా దీన్ని తాగడానికి ఇష్టపడుతుంటారు. అసలే ఎండాకాలం.. ఈ కాలంలో ఇలాంటివి మరింత ఎక్కువగా తాగాలనిపిస్తుంది. మరి, మీరూ ఈ లస్సీ వెరైటీలను ఓసారి ప్రయత్నించి చూడండి...

మ్యాంగో లస్సీ

కావాల్సినవి:

పెరుగు - 125 మి|| లీ||
చల్లని నీళ్లు - 200 మి|| లీ||
ఐస్ క్యూబ్స్ - 8
మామిడి పండు - ఒకటి (తొక్క తీసి చిన్న చిన్న ముక్కలుగా కట్ చేసి పెట్టుకోవాలి)
చక్కెర - టేబుల్ స్పూన్
తయారీ:
ముందుగా మామిడి పండు ముక్కలు, చక్కెర, పెరుగు మిక్సీలో వేసుకొని మెత్తని ప్యూరీలా చేసుకోవాలి. ఆ తర్వాత ఇందులో నీళ్లు పోసుకుంటూ మరీ పల్చగా కాకుండా, మరీ చిక్కగా కాకుండా తయారుచేసుకోవాలి. కావాలంటే మిక్సీ పట్టేటప్పుడే ఐస్ ముక్కలు వేసుకోవచ్చు. లేదంటే మొత్తం పూర్తయ్యాక ఐస్ ముక్కలు వేసి సర్వ్ చేసినా బాగుంటుంది.

బనానా వాల్‌నట్ లస్సీ

కావాల్సినవి:
పెరుగు - కప్పు
అరటి పండు - సగం
వాల్‌నట్స్ - నాలుగు
గింజలు - టీస్పూన్ (నువ్వులు, అవిసె గింజల్లాంటివి వేసుకోవచ్చు)
తేనె - రెండు టీస్పూన్లు
తయారీ:
ముందుగా వాల్‌నట్స్‌ని చిన్నచిన్న ముక్కలుగా చేసుకోవాలి. ఆ తర్వాత మిక్సీలో పెరుగు, వాల్‌నట్స్, నువ్వులు, అవిసె గింజలు, తేనె, అరటి పండ్లు వేసి మెత్తని మిశ్రమంగా చేసుకోవాలి. ఆ తర్వాత దీన్ని గ్లాసులో పోసుకొని అరటి పండు ముక్కలతో గార్నిష్ చేస్తే సరి..

స్ట్రాబెర్రీ లస్సీ

కావాల్సినవి:
స్ట్రాబెర్రీలు - 9-10
చక్కెర - రెండు టేబుల్ స్పూన్లు
పాలు - పావుకప్పు
పెరుగు - కప్పు
ఐస్ క్యూబ్స్ - మూడు
తయారీ:
ముందుగా స్ట్రాబెర్రీలను చిన్న చిన్న ముక్కలుగా కట్ చేసి పెట్టుకోవాలి. ఆపై వాటిని మిక్సీలో వేసి చక్కెర జత చేసి మెత్తని మిశ్రమంగా చేసుకోవాలి. ఇందులో పాలు, పెరుగు వేసి ఇంకోసారి మిక్సీ పట్టుకోవాలి. ఆ తర్వాత ఐస్‌క్యూబ్స్ కూడా వేసి మరోసారి మిక్సీ పట్టి గ్లాసుల్లో పోసి సర్వ్ చేసుకోవాలి. కావాలంటే పైన యాలకుల పొడి చల్లుకోవచ్చు లేదా స్ట్రాబెర్రీ ముక్కలతో అలంకరించుకోవచ్చు.

యాపిల్ లస్సీ

కావాల్సినవి:
యాపిల్ - ఒకటి
పెరుగు - కప్పు
నీళ్లు - అరకప్పు
చక్కెర - నాలుగు టేబుల్ స్పూన్లు
యాలకుల పొడి - పావు టీస్పూన్
తయారీ:
ముందుగా యాపిల్‌ని కడిగి, తొక్క చెక్కేసి, చిన్న చిన్న ముక్కలుగా కట్ చేసి పెట్టుకోవాలి. ఆ తర్వాత ఈ యాపిల్ ముక్కలను మిక్సీలో వేసి మెత్తని పేస్ట్‌లా చేసుకోవాలి. ఆపై అందులో పెరుగు, చక్కెర, యాలకుల పొడి, పావు కప్పు నీళ్లు వేసి మరోసారి బాగా మిక్సీ పట్టుకోవాలి. ఆ తర్వాత మిశ్రమం బాగా చిక్కగా ఉంటే మరో పావు కప్పు నీళ్లను కలుపుకోవాలి. ఆపై ఐస్ ముక్కలు వేసి సర్వ్ చేసుకుంటే సరి..

మసాలా లస్సీ

కావాల్సినవి:
పెరుగు - అర లీటర్
పచ్చి మిర్చి - రెండు
అల్లం ముక్క - అంగుళం
ఉప్పు - టీస్పూన్
మిరియాల పొడి - అర టీస్పూన్
ఛాట్ మసాలా - అర టీస్పూన్
పుదీనా ఆకులు - పది
జీలకర్ర పొడి - అర కప్పు
చల్లని పాలు - అర కప్పు
చల్లని నీళ్లు - కప్పు
కోవా - రెండు టేబుల్ స్పూన్లు
క్రీం - రెండు టేబుల్ స్పూన్లు
ఐస్‌క్యూబ్స్ - నాలుగైదు
తయారీ:
ముందుగా పచ్చిమిర్చి, అల్లం, పుదీనా ఆకులు, మిరియాల పొడి, జీలకర్ర పొడి కలిపి మిక్సీ పట్టుకోవాలి. ఆ తర్వాత అందులో పాలు, పెరుగు, క్రీం వేసుకొని మళ్లీ మిక్సీ పట్టాలి. ఆ తర్వాత ఉప్పు, ఛాట్ మసాలా వేసి నీళ్లు కలిపి మరోసారి మిక్సీ పట్టి తీసేయాలి. ఇందులో కోవా, ఐస్‌క్యూబ్స్ వేసి బాగా కలిపి డ్రైఫ్రూట్స్, ఛాట్‌మసాలా వేసి సర్వ్ చేస్తే సరి..

ఇదీ చూడండి:మా పాపకి ఆ విషయాల గురించి చెప్పొచ్చా?