ఎండాకాలం ఈ జావ తాగితే ఫుల్ ఎనర్జీ

నడినెత్తిన స్ట్రా వేసుకుని మరీ సూరీడు మీ శక్తిని పీల్చేస్తున్నాడా... రెండడుగులు వేయగానే ఎక్కడలేని నీరసం వస్తుందా... ఉత్సాహంగా పనిచేయలేకపోతున్నారా... వీటన్నింటికీ మీ సమాధానం అవుననేగా... అయితే వెంటనే జావ తాగడానికి సిద్ధమైపోండి.

రాగిజావ

రాగి జావ

ఈకాలంలో ఏమీ తినబుద్ధికాదు. చల్లటి నీళ్లు మాత్రం బాగా తాగాలనిపిస్తుంది. అలాంటప్పుడు పల్చని రాగిజావ తయారుచేసుకుని తాగండి. రెండు చెంచాల రాగిపిండిని కప్పు నీళ్లలో కలపండి. దీన్ని రెండు గ్లాసుల నీళ్లలో వేసి .. తక్కువ మంట మీద ఉడికించండి. కాస్త ఉప్పు, మల్చటి మజ్జిగ కలిపి తాగేయండి. ఇష్టమైతే దీంట్లో కరివేపాకు, కొత్తిమీర తరుగు, కొన్ని ఉల్లిపాయ ముక్కలను కూడా చేర్చుకోవచ్చు. తియ్యగా ఉండాలంటే.. కాస్త బెల్లం ముక్క వేసుకుని అరగ్లాసు పాలు కలిపితే సరిపోతుంది.

ఉపయోగాలు:రాగుల్లో అధికంగా ఉండే క్యాల్షియం ఎముకలను బలంగా ఉంచుతుంది. ఇంకా ప్రొటీన్లు, ఎ,బి,సి, విటమిన్లు, ఖనిజాలు అందుతాయి. దీంతో జీర్ణశక్తి పెరుగుతుంది. కాలేయంలోని అదనపు కొవ్వును కరిగిస్తుంది. కొలెస్ట్రాల్‌ స్థాయిని తక్కువ చేయడానికి తోడ్పడుతుంది.

బార్లీజావ

బార్లీ జావ

నాలుగు చెంచాల బార్లీ గింజలను శుభ్రంగా కడిగి నాలుగైదు గంటలపాటు నానబెట్టాలి. తగినన్ని నీళ్లు పోసి వీటిని ఉడికించుకోవాలి. ఎక్కువసేపు నానబెడితే ఉడకడానికి తక్కువ సమయం పడుతుంది. దీంట్లో పల్చటి మజ్జిగ, ఉప్పు, చిటికెడు జీలకర్ర పొడి కలపి తాగితే ఆరోగ్యానికి ఎంతో మంచిది. ఇష్టమైతే నిమ్మరసం కూడా పిండుకోవచ్చు. దీంట్లో గుప్పెడు దానిమ్మగింజలు కలిపితే ఇంకా రుచిగా ఉంటుంది.

ఉపయోగాలు:శరీరంలో అధికంగా ఉండే నీటిని బయటకు పంపిస్తుంది. దీంట్లో పీచు ఎక్కువగా ఉండటం వల్ల త్వరగా ఆకలి వేయదు. అలా అధిక బరువును నియంత్రించడానికి తోడ్పడుతుంది. దీంట్లోని పోషకాలు జలుబు బారిన పడకుండా సాయపడతాయి. అంతేకాదు వ్యాధి నిరోధక శక్తినీ పెంచుతాయి.

• ఇదీ చదవండి :ఎండలో నుంచి ఇంటికి రాగానే.. చల్లని నీళ్లు తాగుతున్నారా?