గంజాయి దందాలో విద్యార్థులు

హైదరాబాద్‌ కేంద్రంగా గంజాయి అక్రమ రవాణా చెలరేగిపోతుంది. విద్యార్థులు వ్యాపారుల అవుతారమెత్తుతున్నారు. ఏడాదిగా గుట్టుచప్పుడు కాకుండా జరుగుతున్న ఈ దందాకు టాస్క్​ఫోర్స్​ అధికారులు చెక్​ పెట్టారు. జనవరి నుంచి ఇప్పటి వరకు నాలుగు ముఠాలను అరెస్ట్​ చేసి విచారించారు.

ఉత్తరాంధ్ర, ఒడిస్సా సరిహద్దులో గంజాయి దందా విచ్చలవిడాగా సాగుతుంది. ఇతర రాష్ట్రాలతో పాటు హైదరాబాద్‌కు కూడా భారీగా చేరుతోంది. ఆర్టీసీ బస్సుల్లో, రైళ్లలో, సొంత వాహనాల్లో గుట్టుచప్పుడు కాకుండా రవాణా జరుగుతుంది. హెరాయిన్‌, కొకైన్‌, యాంపటామైన్‌, ఓపియం లాంటి మాదక ద్రవ్యాలు ఖరీదైనవి కావడంతో ఎక్కువ మంది విద్యార్థులు గంజాయి వైపు మక్కువ చూపుతున్నారు.

విశాఖపట్నంతో పాటు ఒడిస్సా సరిహద్దు ప్రాంతాల్లోని కొందరు ఏజన్సీ ప్రాంతాల్లో భూములు లీజుకు తీసుకుని గంజాయి సాగు చేస్తున్నారు. కళాశాల స్థాయిలో విద్యార్థులకు సరదాగా మొదలైన అలవాటే వారిని బానిసలుగా మార్చేస్తోంది. ఎక్కువ లాభాలు ఉండటం వల్ల కొందరు విద్యార్థులు వ్యాపారులుగా అవతారమెత్తారు. ఏజెన్సీ ప్రాంతానికి వెళ్లి కిలో రూ.1500లకు కొనుగోలు చేసి దానిని హైదరాబాద్‌ తరలించి కిలో రూ.5000 నుంచి రూ.6000 వరకు అమ్ముతున్నారు. ఇలా విక్రయాలకు పాల్పడుతున్న నాలుగు ముఠాలను ఇప్పటికే పోలీసులు అరెస్టు చేశారు.
తాజాగా ఈ నెల నాలుగున మాదన్నపేటలో అయిదుగురు విద్యార్థులను టాస్క్​ఫోర్స్​ అధికారులు అదుపులోకి తీసుకున్నారు. వారి వద్ద నుంచి 42 కిలోలు గంజాయిని స్వాధీనం చేసుకున్నారు. ఈ కేసుల్లో నిందితుల నుంచి తీసుకున్న చరవాణిలోని నంబర్లను పరిశీలించగా ఎక్కువగా విద్యార్థులు ఉన్నట్లు తేలింది. ఏడాది కాలంగా గుట్టుచప్పుడు కాకుండా ఈ వ్యాపారం చేస్తున్నట్లు బహిర్గతమైంది. పదుల సంఖ్యలో గంజాయి వ్యాపారులు ఉన్నట్లు ప్రాథమిక విచారణలో తేల్చిన ఎక్సైజ్‌ అధికారులు మరింత లోతుగా దర్యాప్తు చేయనున్నట్లు తెలిపారు.