రేషన్​ బియ్యాన్ని అక్రమంగా తరలిస్తున్న ఏడుగురు అరెస్టు

ప్రభుత్వ పేదల కోసం సరఫరా చేస్తున్న రేషన్​ బియ్యాన్ని అక్రమంగా ఇతర రాష్ట్రాలకు తరలిస్తున్న 7గురు నిందితులను దుండిగల్​ పోలీసులు అరెస్టు చేసి రిమాండ్​కు తరలించారు. నిందితుల నుంచి ఇన్నోవా కారు, 3 చరవాణులను స్వాధీనం చేసుకున్నామని పేట్​ బషీరాబాద్​ ఏసీపీ నరసింహరావు తెలిపారు.

రేషన్ బియ్యాన్ని అక్రమంగా ఇతర రాష్ట్రాలకు ఆటోలో తరలిస్తున్న 7గురు నిందితులను మేడ్చల్​ జిల్లా దుండిగల్​ పీఎస్​ పోలీసులు అరెస్టు చేసి రిమాండ్​కు తరలించారు. దుండిగల్​ పీఎస్​ పరిధిలో ఈ నెల 15వ తేదీ రాత్రి రేషన్​ బియ్యాన్ని ఆటోలో అక్రమంగా ఇతర రాష్ట్రాలకు తరలిస్తున్న తాండూర్​కు చెందిన ఏడుగురిని అరెస్టు చేసినట్లు పేట్​ బషీరాబాద్​ ఏసీపీ నరసింహరావు తెలిపారు. నిందితులు ఇక్భాల్​, అఫ్సర్​, ఫయాజ్​, నయూం, తోసిఫ్​, ఆసిఫ్​, జబ్బార్​లుగా గుర్తించారు.

కుత్బుల్లాపూర్​లోని రొడామేస్త్రి నగర్​, శాపూర్​నగర్​కు చెందిన మరో 8 మంది తాము పోలీస్​ ఇన్​ఫార్మర్స్​, రిపోర్టర్స్​ అని చెప్పుకుని ఈ ఏడుగురి వద్ద నుంచి డబ్బులు వసూలు చేశారని ఏసీపీ తెలిపారు. వారిని కూడా త్వరలోనే పట్టుకుంటామని ఆయన వెల్లడించారు. వారు అజార్​, ఖయ్యూం, సలీం, ఫర్వేజ్​, అజ్మత్​ అలీ, నవీన్​, శ్రీకాంత్​, సమీర్​లుగా గుర్తించారు.

ఈ ఎనిమిది మంది రేషన్​ బియ్యాన్ని తరలిస్తున్న ఆ 7గురు నిందితులను కైసర్​ నగర్​ వద్ద ఆపి.. రూ.2లక్షలు ఇవ్వాలని లేదంటే పోలీసులకు పట్టిస్తామని బెదిరించారు. నిందితులు డబ్బులు ఇస్తామని చెప్పి అజ్మత్​ అలీ అనే వ్యక్తిని కారులో ఎక్కించుకొని కిడ్నాప్​ చేశారు. ఎంతకూ అజ్మత్​ అలీ తిరిగి రాకపోవడం వల్ల మిగిలిన వారు దుండిగల్​ పోలీసులను ఆశ్రయించారు. బాధితుడు అజ్మత్​ అలీ ఫోన్​ సిగ్నల్​ ఆధారంగా 7గురు నిందితులు తాండూరులో ఉన్నట్లు దుండిగల్​ పోలీసులు గుర్తించారు. వారిని అదుపులోకి తీసుకుని రిమాండ్​కు తరలించారు. నిందితుల నుంచి ఇన్నోవా కారు, 3 చరవాణులను స్వాధీనం చేసుకున్నామని ఏసీపీ తెలిపారు.

ఇవీ చూడండి:పోలీసులే లక్ష్యంగా మందుపాతర.. వెలికితీసిన బాంబ్​స్క్వాడ్