వరంగల్ గ్రామీణ జిల్లా వర్ధన్నపేటలో, వైన్స్ షాపుల లైసెన్స్ రెన్యువల్ కోసం సర్కారు ఖజానాకు చెల్లించాల్సిన నగదుకు సంబంధించి నకిలీ పత్రాలు సృష్టించి యజమానులు, ఎక్సైజ్ అధికారులను టోకరా కొట్టించారు. ఈ ఘటనలో 9 మందిపై చీటింగ్ కేసు నమోదైంది.
మండలానికి చెందిన 4 వైన్స్ షాపుల యజమానులు.. గత డిసెంబర్ 17న షాపుల లైసెన్స్ రెన్యువల్కు సంబంధించిన రూ.68లక్షల 70వేలను స్థానిక ఎస్బీఐ బ్యాంకులో జమ చేసినట్లు తప్పుడు పత్రాలు సృష్టించారు. సంబంధిత అధికారులుకు చలానా పేపర్లు సమర్పించారు.
షాపుల రెన్యువల్కు సంబంధించిన అన్ని వివరాలను స్థానిక ఎక్సైజ్ అధికారులు ఉన్నతాధికారులకు పంపించారు. వాటిలో 4షాపులకు సంబంధించిన నగదు.. ప్రభుత్వ ఖజానాలో జమ కాలేదన్న సమాచారంతో అధికారులు ఖంగుతిన్నారు.
ఆ మేరకు బ్యాంకు మేనేజర్ను సంప్రదించిన అధికారులు.. అన్ని వివరాలు సేకరించారు. బ్యాంకు క్యాషియర్కు, వైన్స్ షాపుల ఓనర్లకు ఉన్న సత్సంబంధాలతో నగదు జమ చేయకున్నా.. చేసినట్లుగా తప్పుడు పేపర్లు ఇచ్చినట్లు వారు గుర్తించారు.
షాపుల యజమానులు, బ్యాంకు క్యాషియర్ పైన పోలీసులకు ఎక్సైజ్ సీఐ ఫిర్యాదు చేశారు. వారిపై చీటింగ్ కేసు నమోదు చేసి, దర్యాప్తు చేస్తున్నట్లు పోలీసులు తెలిపారు.
ఇదీ చదవండి:నకిలీ భూమి పత్రాలు సృష్టించిన నిందితులు అరెస్టు
