శంషాబాద్ ఎయిర్ కార్గోలో పట్టుబడిన ఎనిమిది కిలోల బంగారం, వజ్రాల కేసులో ఆదాయపు పన్ను శాఖ, జీఎస్టీ అధికారులు రంగంలోకి దిగారు. ఈ నెల మూడో తేదీ తెల్లవారు జామున రూ.6.62 కోట్లు విలువైన 8 కిలోలు బంగారు ఆభరణాలు, వజ్రాలు, బంగారు బిస్కెట్లను కస్టమ్స్‌ అధికారులు స్వాధీనం చేసుకున్నారు. ఎలాంటి పత్రాలు లేకుండా ముంబయి, జయపురకు తరలిస్తున్నట్లు గుర్తించి కేసు నమోదు చేసుకున్న ఎయిర్ కార్గో కస్టమ్స్‌ అధికారులు... దర్యాప్తు నిమిత్తం ఆ కేసును హెడ్‌ క్వార్టర్స్‌కు బదిలీ చేశారు.
ఇప్పటికే హైదరాబాద్‌కు చెందిన పవన్‌ కార్గో కొరియర్‌ను అదుపులోకి తీసుకుని విచారిస్తున్నారు. మరింత లోతైన దర్యాప్తు చేసేందుకు ప్రణాళిక సిద్ధం చేసుకుంటున్నట్లు తెలుస్తోంది. విశ్వసనీయ సమాచారం మేరకు ఆ బంగారం హైదరాబాద్, విజయవాడకు చెందిన పలు దుకాణదారులదిగా ప్రాథమికంగా గుర్తించారు.