హైదరాబాద్ గచ్చిబౌలి వద్ద తెల్లవారుజామున ఘోర రోడ్డు ప్రమాదం జరిగింది. విప్రో సర్కిల్ వద్ద టిప్పర్-కారు ఢీకొని.... కారులో ప్రయాణిస్తున్న నలుగురు యువకులు అక్కడికక్కడే మృతి చెందారు. తీవ్రగాయాలైన మరో యువకుడు ఆసుపత్రిలో చికిత్సపొందుతూ ప్రాణాలు విడిచాడు. మాదాపూర్ లోని ఓ వసతి గృహంలో నివసించే కాట్రగడ్డ సంతోష్, భరద్వాజ్ , పవన్, రోషన్, మనోహర్‌లు కలిసి తెల్లవారుజామున 3గంటల సమయంలో కారులో గచ్చిబౌలి నుంచి గౌలిదొడ్డి వైపు వెళ్తున్నారు. అతి వేగంతో దూసుకువచ్చిన కారు గచ్చిబౌలి విప్రో సర్కిల్ వద్ద రెడ్ సిగ్నల్‌ను అతిక్రమించింది. ఈ క్రమంలో అటునుంచి వచ్చిన టిప్పర్ -కారును ఢీకొనటంతో... రెండు వాహనాలు రోడ్డుపై పల్టీలు కొట్టాయి. కారు ఎగిరిపడటంతో... రోడ్డు పక్కనే తాగునీటి కోసం ఏర్పాటు చేసిన షెడ్డు పూర్తిగా ధ్వంసమైంది.
మృతులు కాట్రగడ్డ సంతోష్, చింతా మోహన్, పప్పు భరద్వాజ్, రోషన్, పవన్‌గా పోలీసులు గుర్తించారు. పశ్చిమగోదావరి జిల్లా దేవరపల్లి మండలం సంగాయిగూడెంకు చెందిన సంతోష్ టెక్ మహీంద్రాలో సాఫ్ట్ వేర్ ఇంజినీర్‌గా పనిచేస్తున్నాడు. తూర్పు గోదావరి జిల్లా సఖినేటిపల్లికి చెందిన మనోహర్ , నెల్లూరు జిల్లాకు చెందిన రోషన్, పవన్ కుమార్, విజయవాడకు చెందిన భరద్వాజ్ ప్రాణాలు కోల్పోయినట్లు పోలీసులు గుర్తించారు.