ఇరాన్​లో​​ భూకంపం- ఐదుగురు మృతి

ఇరాన్ దేశంలో భూకంపం సంభవించింది. ఈ ఘటనలో ఐదుగురు మృతి చెందారు. 300 మందికి పైగా గాయాలయ్యాయి. రిక్టర్​ స్కేల్​పై భూకంప తీవ్రత 5.9గా నమోదైంది.

వాయువ్య​ ఇరాన్​ను భూకంపం వణికించింది. ప్రకృతి విపత్తులో ఐదుగురు ప్రాణాలు కోల్పోగా.. 300 మందికి పైగా గాయాలయ్యాయి. రిక్టర్​ స్కేల్​పై భూకంప తీవ్రత 5.9గా నమోదైంది. భూకంపం కారణంగా పలు ఇళ్లు ధ్వంసమయ్యాయి.

తూర్పు అజెర్​బైజాన్​ ప్రావిన్స్​లోని టేబ్రిజ్​ నగరానికి 120 కిలోమీటర్ల దూరంలో భూకంపం సంభవించిందని ఇరాన్​ భూకంప కేంద్రం ప్రకటించింది. భూకంప తీవ్రతకు 40 ఇళ్లు ధ్వంసం కాగా, 200 పశువులు మరణించినట్లు అధికారులు ప్రకటించారు. మొత్తం 340 మంది గాయాలతో ఆసుపత్రిలో చికిత్స పొందుతున్నట్లు వెల్లడించారు.

వర్నకేష్, వర్జాఘన్ ప్రాంతాలు తీవ్రంగా ప్రభావితమయ్యాయని ప్రొవిన్షియల్​ గవర్నర్​ మహమ్మద్​ రెజా పౌర్బోహమ్మడి తెలిపారు. భూకంప ప్రభావానికి గురైన 41 గ్రామాల్లో సహాయక చర్యలు ముమ్మరంగా జరుగుతున్నాయని వెల్లడించారు గవర్నర్.

వర్నకేష్​ ప్రాంతంలో పునరావాస కేంద్రాలను ఏర్పాటు చేసినట్లు అధికారులు చెప్పారు. బాధితులకు అవసరమైన నిత్యావసర సరుకులను అందించామని వెల్లడించారు.

గతంలోనూ...

గత కొన్ని దశాబ్దాలుగా ఇరాన్ భూకంపాలను ఎదుర్కొంటోంది. 2012లో సంభవించిన భూకంపంలో 300 మంది, 2005 నాటి ప్రకృతి విపత్తులో 600మంది ప్రాణాలు కోల్పోయారు. 2003లో చారిత్రక బామ్​ నగరంలో భూకంపం సంభవించి 31 వేలమంది మరణించారు. 1990 లోనూ ఉత్తర ఇరాన్​లో వచ్చిన భూకంపానికి 40 వేల మంది చనిపోగా... 3 లక్షల మంది గాయపడ్డారు. మరో 5 లక్షలమంది నిరాశ్రయులయ్యారు. భూకంపాల కారణంగా పదుల సంఖ్యలో పట్టణాలు, 2 వేల గ్రామాలు శిథిలావస్థకు చేరుకున్నాయి.

ఇదీ చూడండి:బ్రిటన్​: ఉప్పొంగి ప్రవహిస్తున్న డాన్​ నది