Ukraine Attack Russia Black Sea Port : కొన్నిరోజుల నుంచి రష్యాపై డ్రోన్లతో విరుచుకుపడుతున్న ఉక్రెయిన్.. దాడులను మరింత ఉద్ధృతం చేసింది. రష్యా ఎగుమతులకు అత్యంత కీలకమైన ఓ ఓడరేవుపై ఉక్రెయిన్ బలగాలు డ్రోన్‌తో దాడి చేశాయి. నల్లసముద్రంలో రష్యాకు చెందిన ఓడరేవుపై ఓ సముద్ర డ్రోన్‌ దాడి చేసింది. ఉక్రెయిన్‌కు చెందిన కిల్లర్‌ డ్రోన్‌ దాడిలో మాస్కో నౌకాదళానికి చెందిన ల్యాండింగ్‌ షిప్‌ తీవ్రంగా దెబ్బతింది. ఈ నేపథ్యంలో రష్యాకు కీలకంగా ఉన్న ఈ ఓడరేవులో తాత్కాలికంగా కార్యకలాపాలను నిలిపివేసినట్లు తెలుస్తోంది.
Ukraine Attacks Russia Ship : తొలిసారి రష్యా వాణిజ్య ఓడరేవుపై ఉక్రెయిన్ దాడి చేసింది. నౌకాదళంతో కలిసి సంయుక్తంగా ఈ ఆపరేషన్‌ నిర్వహించినట్లు ఉక్రెయిన్ సెక్యూరిటీ సర్వీసెస్‌ వెల్లడించింది. ఈ కిల్లర్‌ సముద్ర డ్రోన్‌లో 450కిలోల టీఎన్‌టీని అమర్చి దాడిచేసినట్లు తెలిపాయి. దాడి సమయంలో రష్యా యుద్ధనౌకలో వందమంది వరకు సిబ్బంది ఉన్నట్లు అంచనా. ఈ దాడితో రష్యా యుద్ధనౌక తీవ్రంగా దెబ్బతినటంతోపాటు పనిచేయలేని స్థితికి చేరిందని ఉక్రెయిన్ సైనికవర్గాలు వెల్లడించాయి.