90 Years Old Woman Job : ఉద్యోగాలు చేసే వారు సాధారణంగా ఎప్పుడో ఒకప్పుడు సెలవులు పెడుతూనే ఉంటారు. కానీ ఓ మహిళ మాత్రం తన జీవిత కాలంలో ఒక్కసారి కూడా లీవు పెట్టలేదు! తన 16వ ఏట ఉద్యోగంలో చేరిన ఓ బాలిక.. 74 ఏళ్ల పాటు విధులు నిర్వర్తించి.. 90 ఏళ్ల వయసులో పదవీ విరమణ చేశారు. అమెరికాలో జరిగిన ఈ సంఘటన అందర్నీ ఆశ్చర్యంలో ముంచెత్తుతోంది. 74 ఏళ్ల ఉద్యోగ సమయంలో ఒక్కరోజు కూడా విశ్రాంతి లేకుండా ఎలా పనిచేశారని.. అంతా నోరెళ్లబెడుతున్నారు.
లిఫ్ట్ ఆపరేటర్గా ఉద్యోగ జీవితాన్ని..
టెక్సాక్‌కు చెందిన మెల్బా మెబానే(90) అనే మహిళ.. టైలర్‌ అనే స్టోర్‌లో 1949లో ఉద్యోగంలో చేరారు. ఆ తర్వాత 1956లో ఆ సంస్థను డిలార్డ్‌ కొనుగోలు చేసింది. తొలుత లిఫ్ట్ ఆపరేటర్గా ఉద్యోగ జీవితాన్ని ప్రారంభించిన మెబానే.. అలా 74 ఏళ్లపాటు అదే సంస్థలో కొనసాగారు. ఆ షాపింగ్‌ మాల్‌లో దుస్తులు, కాస్మెటిక్‌ విభాగంలోనే సుదీర్ఘ కాలం పాటు పనిచేశారు. అయితే ఈ ఏడు దశాబ్దాల కాలంలో సెలవు లేకుండా విధులకు హాజరయ్యారు. గత నెలలో పదవీ విరమణ చేశారు.
తీవ్ర భావోద్వేగానికి లోనై..
74 ఏళ్ల సుదీర్ఘ కెరీర్‌కు ముగింపు పలుకుతూ పదవీ విరమణ చేసిన మెల్బా మెబానే తీవ్ర భావోద్వేగానికి లోనయ్యారు. తాను ఇంట్లో కంటే ఆ స్టోర్‌లోనే ఎక్కువ కాలం ఉన్నానని ఆమె గుర్తు చేసుకున్నారు.