సెల్ఫీలకు సూపర్​ స్పాట్​... దిగితే మాత్రం...!

ఆ సరస్సు... ఎప్పుడూ నీటితో కళకళలాడుతూ ఉంటుంది. చూసేందుకు మాల్దీవుల్లోని ఓ అందమైన బీచ్​లా కనిపిస్తుంది. అందుకే అక్కడకు జనం క్యూ కడుతున్నారు. సెల్ఫీలు తీసుకునేందుకు పోటీ పడుతున్నారు. ఈ అందం, ఆనందం వెనుక పెద్ద ప్రమాదముంది. ఏంటది? ఎక్కడ ఉందా సరస్సు?

అందమైన బీచ్​... అడుగున ఏముందో కనిపించేంత స్వచ్ఛమైన నీరు... అలల సవ్వడులు, పిల్ల గాలులు... మాల్దీవులు వంటి ప్రముఖ పర్యటక ప్రదేశాల్లో కనిపించే వాతావరణం ఇది. అంతటి అద్భుత వాతావరణాన్ని ఆస్వాదించేందుకు ఎంతో మంది లక్షలు ఖర్చు చేస్తుంటారు. నీలి రంగు సముద్ర తీరాన సరదాగా గడుపుతూ సెల్ఫీలు తీసుకుంటుంటారు.

రష్యా సైబీరియాలోని నోవోసిబిరిస్క్​ నగరవాసులు ఇలాంటి వాతావరణంలో గడిపేందుకు పెద్ద కష్టపడాల్సిన పనిలేదు. ఖర్చూ లేదు. అలా అని... ఆ నగరం దగ్గర సముద్రమేమీ లేదు. ఉన్నదల్లా ఓ చిన్న సరస్సు. అది కూడా కృత్రిమమైందే.

సైబీరియన్​ మాల్దీవులుగా పిలుస్తున్న ఈ సరస్సుకు నోవోబిరిస్క్​ వాసులు క్యూ కడుతున్నారు. బికినీలు మొదలు పెళ్లి దుస్తుల వరకు... రకరకాల వేషధారణాల్లో ఫొటోలు తీసుకుంటున్నారు. సోషల్​ మీడియాలో షేర్​ చేస్తున్నారు.

అంతా బాగుంది కానీ...

చూసేందుకు ఎంతో అందంగా, ఆహ్లాదంగా కనిపిస్తున్న ఈ సరస్సు... విషపూరితం. నిజానికి... ఇది ఒక డంపింగ్ యార్డ్​. పక్కనున్న విద్యుత్​ ఉత్పత్తి కేంద్రం నుంచి వెలువడే ప్రమాదకర వ్యర్థాలు, బూడిదను ఇక్కడ పడేస్తారు. భార లోహాలు కలిగిన ఈ నీటిలో దిగితే శరీరానికి అలెర్జీ రావడం ఖాయం.
రోజురోజుకూ సందర్శకుల తాకిడి పెరుగుతున్న నేపథ్యంలో విద్యుత్ ఉత్పత్తి కేంద్రం యాజమాన్యం అప్రమత్తమైంది. సరస్సు వద్దకు ఎవరూ రాకుండా చూసేందుకు భద్రతా సిబ్బందిని రంగంలోకి దించింది.

ఇదీ చూడండి:గ్రీసులో తుపాను బీభత్సం- ఏడుగురు మృతి