భారత్, పాకిస్థాన్ల మధ్య నెలకొన్న ఉద్రిక్తతల నేపథ్యంలో ఇరు దేశాలు కశ్మీర్ ప్రజల హక్కులను గౌరవించాలని, రక్షించాలని కోరారు ఐరాస మానవ హక్కుల చీఫ్ మిచెల్ బచెలెట్. కశ్మీర్లోని నియంత్రణ రేఖకు ఇరువైపులా మానవ హక్కుల పరిస్థితులపై ఎప్పటికప్పుడు నివేదిక తీసుకుంటున్నట్లు తెలిపారు.
కశ్మీర్పై ఎలాంటి నిర్ణయాలు తీసుకున్నా అక్కడి ప్రజల అభిప్రాయాలను తెలుసుకోవాలని, నిర్ణయాల్లో భాగస్వాములను చేయాలని కోరారు బచెలెట్. అలాగే అసోం జాతీయ పౌర రిజిస్టర్లో పేరు లేని వారిని ఎలాంటి అధారం లేకుండా వదిలివేయకూడదన్నారు.
పాక్ కొత్త వాదన...
ఐరాసఆందోళన వ్యక్తం చేసిన తీరు.. కశ్మీర్పై అంతర్జాతీయ సంస్థ వైఖరి తెలియజేస్తుందని పాకిస్థాన్ కొత్తవాదం తెరపైకి తెచ్చింది. జమ్ముకశ్మీర్లో పరిస్థితులు దిగజారుతున్నాయని ఆ దేశ విదేశాంగ శాఖ ప్రతినిధి మరోసారి విషం చిమ్మారు.
మానవ హక్కుల మండలి సమావేశానికి జెనివా వెళ్లనున్నారు పాక్ విదేశాంగ మంత్రి మహమూద్ ఖురేషీ. ఆ సమావేశాల్లో భాగంగా వివిధ దేశాధినేతలతో భేటీ అయి కశ్మీర్ అంశాన్ని లేవనెత్తే అవకాశం ఉంది.
పాక్పై కాంగ్రెస్ విమర్శలు...
జైషే మహ్మద్ ఉగ్రసంస్థ అధినేత మసూద్ అజర్ను విడుదల చేసినట్లు వచ్చిన వార్తల నేపథ్యంలో పాకిస్థాన్పై తీవ్ర ఆరోపణలు చేసింది కాంగ్రెస్. భారత బలగాలపై దాడులు చేస్తామని పేర్కొంటున్న ఉగ్రవాదిని విడుదల చేసి ఐరాసలో కశ్మీర్ అంశంపై పాక్ ఏ విధంగా మాట్లాడుతుందని ఆగ్రహం వ్యక్తం చేసింది.
కశ్మీర్పై పాక్కు చిత్తశుద్ధి లేదని పేర్కొన్నారు కాంగ్రెస్ సీనియర్ నేత శశి థరూర్. గిల్గిత్-బాల్టిస్థాన్, పీఓకేపై తన వైఖరిని మార్చుకున్న పాకిస్థాన్ భారత్ వైపు ఏవిధంగా వేలెత్తి చూపుతుందని ప్రశ్నించారు. భారత అంతర్గత విషయాల్లో పాక్ జోక్యం చేసుకోలేదని స్పష్టం చేశారు. ప్రతిపక్ష పార్టీగా ప్రభుత్వాన్ని విమర్శించినప్పటికీ.. అంతర్జాతీయంగా తామంతా ఒక్కటేనని స్పష్టం చేశారు. ఎట్టిపరిస్థితుల్లోనూ పాకిస్థాన్కు మద్దతు ఇచ్చేది లేదని తెలిపారు.
ఇదీ చూడండి: బ్రిటన్ పార్లమెంటు నెలరోజుల పాటు రద్దు
