ప్రధానిగా థెరిసా మే చివరి భావోద్వేగ ప్రసంగం

బ్రిటన్​ ప్రధాని హోదాలో థెరిసా మే చివరి సారిగా ప్రజలను ఉద్దేశించి ప్రసంగించారు. బ్రెగ్జిట్ ఒప్పందాన్ని కుదుర్చలేకపోయాననే అసంతృప్తి తనలో మిగిలిపోయిందని భావోద్వేగానికి లోనయ్యారు.

బ్రిటన్​ ప్రధానిగా థెరిసా మే తన చివరి ప్రజా పర్యటనను పూర్తి చేశారు. రెండో ప్రపంచ యుద్ధానికి సైనిక చర్యలు ప్రారంభించి 75 ఏళ్లు పూర్తయిన సందర్భంగా ఫ్రాన్స్​లోని నార్మండేలో జరిగిన డీ-డే వేడుకల్లో ఆమె పాల్గొన్నారు.

1944లో జూన్​ 6న జర్మనీని ఎదుర్కొనేందుకు ఐరోపా దేశాలు సైనిక చర్యలను ప్రారంభించింది నార్మండే నుంచే.

ఈ సందర్భంగా ప్రపంచ యుద్ధంలో స్వాతంత్ర్యం కోసం పోరాడిన వీర జవాన్లకు నివాళులు అర్పించారు మే. సైనికుల గురించి మాట్లాడటం గర్వంగా భావిస్తున్నట్లు ఆమె తెలిపారు. అప్పటి సైనికుల కాలాన్ని ఓ ప్రత్యేకమైన, గొప్ప తరంగా ఆమె అభివర్ణించారు.

నేడు అధికారికంగా తప్పుకోనున్న థెరిసా

జూన్ 7న థెరిసా మే అధికారికంగా బ్రిటన్​ ప్రధాని పదవి నుంచి తప్పుకోనున్నారు. గత నెలలోనే డౌనింగ్​ స్ట్రీట్​ (బ్రిటన్​ పాలకులు నివాసం ఉండే వీధి)ని వీడేందుకు ప్రణాళికను సిద్ధం చేసుకున్నారు.

థెరిసా తర్వాత బ్రిటన్ ప్రధాని పీఠం దక్కించుకునేందుకు కన్జర్వేటివ్ పార్టీ నుంచి 11 మంది ఎంపీలు పోటీ పడుతున్నారు. ఈ రేసులో విదేశాంగ మాజీ కార్యదర్శి బోరిస్ జాన్సన్​ ముందు వరుసలో ఉన్నారు. అయితే అధికారికంగా దీనిపై నిర్ణయం వెలువడాల్సి ఉంది.

"బ్రెగ్జిట్ ఒప్పందాన్ని కుదుర్చలేకపోయాననే అసంతృప్తి నాలో మిగిలిపోయింది. ఇది ఎప్పటికీ నాకు విచారకరంగానే అనిపిస్తుంది. నా తర్వాత.. బాధ్యతలు చేపట్టే ప్రధాని బ్రెగ్జిట్​ను ముందుకు నడిపిస్తారని అనుకుంటున్నాను." - థెరిసా మే, బ్రిటన్ ప్రధాని