పక్షిలా ఎగురుతూ ఫ్రాన్స్​ నుంచి ఇంగ్లాండ్​కు!

పక్షిలా గాలిలో ఎగురుతూ.. ఫ్రాన్స్​ నుంచి ఇంగ్లాండ్​ చేరుకుని చరిత్ర సృష్టించారు 40 ఏళ్ల ఫ్రెంచ్​ ఆవిష్కర్త ఫ్రాంకీ జపాటా. తాను తయారు చేసుకున్న ప్రత్యేక 'హోవర్​బోర్డు' యంత్రం సహాయంతో ఈ ఘనతను సాధించారాయన.

మనిషి తలుచుకుంటే ఏదైనా సాధ్యమేనని నిరూపించారు ఫ్రాన్స్​కు చెందిన ఫ్రాంకీ జపాటా అనే ఆవిష్కర్త. తాను సృష్టించిన హోవర్​బోర్డ్​ అనే యంత్రం సహాయంతో పక్షిలా ఎగురుతూ ఫ్రాన్స్​ నుంచి ఇంగ్లాండ్​ చేరుకుని చరిత్ర సృష్టించారు 40 ఏళ్ల జపాటా.

ఫ్రాన్స్​లోని సాంగెట్​లో బయల్దేరి ఇంగ్లీష్​ ఛానల్​ మీదుగా బ్రిటన్​లోని సెయింట్ మార్గరేట్​లో సురక్షితంగా దిగారాయన. మొత్తం 35 కిలోమీటర్ల ప్రయాణాన్ని.. 22 నిమిషాల్లో పూర్తి చేశారు. మధ్యలో ఒక సారి ఇంధనం నింపుకునేందుకు కిందకు దిగారు. 5 చిన్నపాటి జెట్ ఇంజిన్లున్న ఈ హోవర్​బోర్డు కిరోసిన్​తో పనిచేస్తుంది.

నిజానికి.. పది రోజుల క్రితమే ఇలా ఎగిరేందుకు ప్రయత్నించారు జపాటా. తొలి ప్రయత్నంలో కొన్ని నిమిషాల ప్రయాణం తర్వాత హోవర్​బోర్డ్​ విఫలమైంది. యంత్రం పూర్తిగా ధ్వంసమైంది. అయినప్పటికీ నిరాశ చెందకుండా హోవర్​బోర్డును జపాటా తిరిగి నిర్మించారు.

తాజాగా ఆగస్టు 4న రెండో ప్రయత్నంలో విజయం సాధించారు. తన కృషి ఫలించినందుకు జపాటా ఆనందానికి అవధుల్లేవు. ఇంగ్లీష్​ ఛానల్ దాటడం ఎంతో మధురమైన సందర్భంగా చెప్పుకొచ్చారు.

ఇదీ చూడండి: మలేషియా జూ పార్కులో ఫ్రెండ్​షిప్​ 'పాండా'