రష్యా ప్రతిపక్ష నేత అనుచరురాలు అరెస్ట్

రష్యా ప్రతిపక్ష నేత, అవినీతి వ్యతిరేక ఉద్యమకారుడు అలెక్సీ నావల్ని అగ్ర అనుచరుల్లో ఒకరైన లైబోవ్​ సోబోల్​ని పోలీసులు అదుపులోకి తీసుకున్నారు. నావల్నీ విషప్రయోగంపై కీలక వ్యాఖ్యలు చేసిన భద్రతాధికారి నివాసంలోకి వెళ్లేందుకు ప్రయత్నించిన సోబోల్​ను అరెస్ట్ చేసినట్లు పోలీసులు స్పష్టం చేశారు.

రష్యా ప్రతిపక్ష నేత అలెక్సీ నావల్నీ అనుచరుల అరెస్టుల పర్వం కొనసాగుతోంది. తాాజాగా నావల్నీ అనుచరుల్లో ఒకరైన లైబోవ్​ సోబోల్​ని పోలీసులు అదుపులోకి తీసుకున్నారు. నావల్నీపై జరిగిన విషప్రయోగ వివరాలను వెల్లడించిన భద్రతా అధికారి నివాసంలోకి వెళ్లేందుకు యత్నించారన్న ఆరోపణలపై సోబోల్​ని అదుపులోకి తీసుకున్నారు. అపార్ట్​మెంట్​లోకి అక్రమంగా చొరబడిన ఆరోపణలపై 48 గంటల పాటు విచారణ చేపట్టిన అనంతరం ఆమెను అరెస్టు చేశారు. ఈ ఆరోపణలను సోబోల్​ ఖండించారు.

అపార్ట్​మెంట్​ తలుపు బెల్​ మోగించడం నిబంధనలను అతిక్రమించడమెలా అవుతుందని ఆమె ప్రశ్నించారు. దేశంలో అవినీతి నిరోధక ఫౌండేషన్​లో లైబోవ్​ సోబోల్​ కీలక వ్యక్తిగా ఉన్నారు. గత ఆగస్టులో విషప్రయోగానికి గురైన నావల్నీ మెరగైన చికిత్స కోసం జర్మనీలో చికిత్స తీసుకుంటున్నారు.

మరోవైపు గతవారం కోన్స్​టాటిన్​ కుద్రియావెత్సేవ్​ అనే వ్యక్తి ఫోన్​ చేసి ఫెడరల్​ సెక్యూరిటీ సర్వీసు అధికారిగా పరిచయం చేసుకున్నాడని నావల్నీ తెలిపారు. ఈ మేరకు ఫోన్​ సంభాషణల్ని విడుదల చేశారు. ఫోన్​ చేసిన వ్యక్తే తనపై విష ప్రయోగం చేసి కప్పిపుచ్చేందుకే ప్రయత్నిస్తున్నారని అనుమానం వ్యక్తం చేశారు.

ఖండించిన రష్యా..

రసాయన ఆయుధాలపై ప్రత్యేక శిక్షణ పొందిన ​ఫెడరల్​ సెక్యూరిటీ​ ఏజెంట్లు తనని వెంబడించారని.. విష ప్రయోగం జరిగినప్పుడు దగ్గర్లోనే ఉన్నారని జర్మనీలో చికిత్స పొందుతున్న నావల్నీ తెలిపారు. ఈ అంశంపై దర్యాప్తు బృందం బెల్లింగ్​కాట్​ ఒక నివేదికను విడుదల చేసిన నేపథ్యంలో నావల్నీ ఆరోపణలు ప్రాధాన్యం సంతరించుకున్నాయి. ఈ ఆరోపణలను రష్యా అధికారులు కొట్టిపారేశారు. నావల్నీ విడుదల చేసిన ఫోన్​ సంభాషణలు నకీలీవని తెలిపారు.

ఇదీ చదవండి:2020లో ప్రపంచాన్ని కుదిపేసిన ఘటనలివే!