omicron variant cases: కరోనా కొత్త వేరియంట్పై దక్షిణాఫ్రికా నవంబర్ 24న ప్రపంచానికి సమాచారం అందించింది. అయితే, గత అక్టోబర్లోనే ఈ వైరస్ వ్యాప్తి మొదలైనట్లు తాజాగా వెల్లడైంది. దక్షిణాప్రికా కొత్త వేరియంట్ 'ఒమిక్రాన్'ను గుర్తించేందుకు కొన్ని వారాల ముందు సేకరించిన నమూనాలో కొత్త వైరస్ నిర్ధరణ అయినట్లు నైజీరియా తాజాగా ప్రకటించింది.
దక్షిణాఫ్రికా నుంచి వచ్చిన వారి నమూనాలు సేకరించి పరీక్షించగా కొత్త వేరియంట్ నిర్ధరణ అయినట్లు ఆ దేశ జాతీయ ప్రజారోగ్య సంస్థ వెల్లడించింది. మొత్తంగా ఇద్దరికి ఈ వైరస్ నిర్ధరణ అయిందని తెలిపింది. దీంతో.. ఒమిక్రాన్ కేసులు వచ్చిన తొలి పశ్చిమ ఆఫ్రికా దేశంగా నైజీరియా నిలించింది.
నెదర్లాండ్స్లోనూ..
కొత్త వేరియంట్పై ప్రపంచ ఆరోగ్య సంస్థను దక్షిణాఫ్రికా హెచ్చరించకముందే.. తమ దేశంలోకి ఒమిక్రాన్ వ్యాపించి ఉంటుందని నెదర్లాండ్స్ వెల్లడించింది. నవంబర్ 24న కొత్త వేరియంట్ గురించి డబ్ల్యూహెచ్ఓకు దక్షిణాఫ్రికా చెప్పిందని.. అయితే తమ దేశంలో 19 నుంచి 23 మధ్య తీసిన నమూనాల్లో ఒమిక్రాన్ను గుర్తించినట్టు నెథర్లాండ్స్ ఆరోగ్యశాఖ అధికారులు వెల్లడించారు.
సౌదీలో తొలి కేసు..
కరోనా కొత్త వేరియంట్ ఒమిక్రాన్ తొలి కేసును గుర్తించినట్లు సౌదీ అరేబియా వెల్లడించింది. ఉత్తర ఆఫ్రికా దేశం నుంచి వచ్చిన వ్యక్తిలో వైరస్ నిర్ధరణ అయినట్లు ఆ దేశ అధికారిక మీడియా తెలిపింది. వైరస్ సోకిన వ్యక్తితో పాటు ఆయన సన్నిహితులను క్వారంటైన్కు తరలించినట్లు పేర్కొంది. దీంతో గల్ఫ్ దేశాల్లో తొలి ఒమిక్రాన్ కేసు నమోదైనట్లయింది.
ఇప్పటి వరకు సుమారు 20 దేశాల్లో ఒమిక్రాన్ వేరియంట్ వెలుగు చూసింది. క్రమంగా ఒక్కోదేశానికి వైరస్ వ్యాప్తి చెందుతున్నందున ప్రపంచవ్యాప్తంగా ప్రయాణ ఆంక్షలు మొదలయ్యాయి.
జపాన్లో బూస్టర్ డోస్ల పంపిణీ
కొత్త వేరియంట్ వేగంగా వ్యాప్తి చెందుతుందన్న ఆందోళనల నేపథ్యంలో ఆరోగ్య సిబ్బందికి బూస్టర్ డోస్ల పంపిణీ ప్రారంభించింది జపాన్. 9నెలల క్రితం వ్యాక్సిన్ తీసుకున్నవారు బూస్టర్ తీసుకునేందుకు ముందుకు వచ్చినట్లు అధికారులు తెలిపారు. టోక్యో మెడికల్ సెంటర్లో కొందరు నర్సులు, డాక్టర్లకు బూస్టర్ డోస్లు పంపిణీ చేశారు.
అంతర్జాతీయ విమానాలపై ఆంక్షలు
కొత్త వేరియంట్ ఆందోళనల నేపథ్యంలో డిసెంబర్ చివరి వరకు జపాన్కు చేరుకునే విమానాల్లో కొత్త రిజర్వేషన్లు తీసుకోవద్దని అంతర్జాతీయ ఎయిర్స్లైన్స్ను ఆదేశించింది ఆ దేశ ప్రభుత్వం. అత్యవసర చర్యల్లో భాగంగా ఈ నిర్ణయం తీసుకున్నట్లు పేర్కొంది. అయితే, ఇప్పటికే రిజర్వేషన్ చేసుకున్నవారిపై ఎలాంటి ప్రభావం ఉండబోదు. ఇప్పటికే దేశంలో ఒమిక్రాన్ వేరియంట్ రెండు కేసులు వెలుగు చూశాయి.
ఆస్ట్రేలియాలో లాక్డౌన్ పొడిగింపు..
దేశంలో కరోనా కేసుల పెరుగుదల, కొత్త వేరియంట్ భయాల నేపథ్యంలో డిసెంబర్ 11వరకు దేశవ్యాప్తంగా లాక్డౌన్ పొడిగించింది ఆస్ట్రేలియా. నవంబర్ 22న ప్రారంభమైన జాతీయ లాక్డౌన్ను పొడిగిస్తూ మంగళవారం నిర్ణయం తీసుకుంది పార్లమెంటరీ కమిటీ. రాత్రి 9గంటల వరకు అనుమతిస్తున్న అత్యవసర వస్తువుల దుకాణాలను సైతం సాయంత్రం 7 గంటలకే మూసివేయాలని ఆదేశించింది. క్రిస్మస్ ట్రీ అమ్మకాలకు ప్రత్యేక అనుమతులు ఇచ్చారు.
అత్యవసర భేటీకి ఈయూ నో..
ఒమిక్రాన్ వేరియంట్ వెలుగు చూసిన క్రమంలో అత్యవసరంగా బ్లాక్ లీడర్స్ స్థాయి సమావేశం నిర్వహించాలన్న నిర్ణయానికి యురోపియన్ యూనియన్ నిరాకరించింది. డిసెంబర్ 16న నేతల సాధారణ సమావేశానికి ముందు 27 దేశాల ఆరోగ్య మంత్రులు ప్రస్తుత పరిస్థితులను అంచనా వేస్తారని ఈయూ అధికారి తెలిపారు. అత్యవసర సమావేశం ఎప్పుడనే అనిశ్చితి నెలకొన్న క్రమంలో ఈ ప్రకటన చేయటం ప్రాధాన్యం సంతరించుకుంది. ఈ భేటీపై రోజుల తరబడి చర్చ జరుగుతున్నా.. 27 దేశాల నాయకులు హాజరయ్యేందుకు ఒక తేదీని నిర్ణయించలేకపోయారు. కొత్త వేరియంట్పై సరైన సమాచారం అందుబాటులో లేనందుకు ఎలాంటి నిర్ణయం తీసుకుంటారో అనే అంశంపైనా గందరగోళం నెలకొంది.
ఐరోపాలోని 11దేశాల్లో ఇప్పటి వరకు 44 ఒమిక్రాన్ కేసులు వెలుగు చూశాయి. అందులో చాలా మంది ఆఫ్రికాకు వెళ్లివచ్చినవారే ఉన్నట్లు తేలింది. ఒమిక్రాన్ వ్యాప్తి నేపథ్యంలో రోజువారీ పరిస్థితులను ఐరోపా దేశాలు, యూరోపియన్ కౌన్సిల్ ప్రత్యేకంగా పర్యవేక్షిస్తున్నాయి.
ఇదీ చూడండి:Covid Endemic Phase: ఒమిక్రాన్ ఎంట్రీతో.. ముగిసిన మహమ్మారి దశ!
