359 కాదు 253 మందే మరణించారు: శ్రీలంక

బాంబు పేలుళ్ల ఘటనలో మొత్తం 253 మంది చనిపోయారని అధికారికంగా ప్రకటించింది శ్రీలంక ప్రభుత్వం. లెక్కలు అంచనా వేయడంలో  తప్పిదం కారణంగానే ముందుగా 350కిపైగా మృతి చెందినట్లు వార్తలు వచ్చాయని వివరణ ఇచ్చింది. మొత్తం 485 మంది గాయపడినట్టు తెలిపింది.

ఈస్టర్​ రోజున శ్రీలంకలో జరిగిన దారుణ మారణహోమంలో ఇప్పటి వరకు 253 మంది మృతి చెందినట్లు ఆ దేశ ప్రభుత్వం అధికారికంగా తెలిపింది. లెక్కల్లో తలెత్తిన పొరపాటు కారణంగా ముందుగా 350కి పైగా మరణించారని వార్తాలొచ్చాయని వివరణ ఇచ్చింది. అది కేవలం అంచనా మాత్రమేనని పేర్కొంది. మొత్తం 485 మంది గాయపడ్డారని తెలిపింది. ఇంకా 149 మంది ఆసుపత్రుల్లో చికిత్స పొందుతున్నారని శ్రీలంక ఆరోగ్యాధికారి డాక్టర్​ అనిల్ జాసింఘే తెలిపారు. మృతుల్లో 11 మంది భారతీయులు సహా మొత్తం 40 మంది విదేశీయులున్నారు.

మసీదులకు కట్టుదిట్టమైన భద్రత

ఆదివారం వరుస ఆత్మాహుతి దాడులకు పాల్పడిన ఇస్లామిస్ట్​ అతివాద సంస్థ నేషనల్​ తాహీద్​ జమాత్​ ఈసారి మసీదులను లక్ష్యంగా చేసుకుని శుక్రవారం దాడులు జరిపే ప్రమాదముందని శ్రీలంక నిఘా వర్గాలు హెచ్చరించినట్లు ఆ దేశ మీడియాలో వార్తలొచ్చాయి. మసీదుల వద్ద అధికారులు కట్టుదిట్టమైన భద్రతా ఏర్పాట్లు చేశారు. సాధారణ ప్రజలు భయాందోళనలకు గురి కావాల్సిన అవసరం లేదని తెలిపారు.

గ్రనేడ్లు కలిగిన ముగ్గురు అనుమానితుల అరెస్టు

21 హ్యాండ్​ గ్రనేడ్లు, ఆరు కత్తులు కలిగి ఉన్న ముగ్గురు అనుమానితులను కొలంబో సమీప ప్రాంతంలో అదుపులోకి తీసుకున్నారు శ్రీలంక భద్రతా అధికారులు. పేలుళ్లకు సంబంధించిన కేసులో ఇప్పటి వరకు 70 మంది అనుమానితులను అరెస్టు చేశారు.

ఆత్మాహుతి సభ్యుడికి గతంలో ఆస్ట్రేలియా వీసా

ఆదివారం ఆత్మాహుతి దాడికి పాల్పడిన వ్యక్తుల్లో ఒకరికి గతంలో ఆస్ట్రేలియా వీసా ఉందని ఆ దేశ ప్రధాని స్కాట్ మారిసన్ తెలిపారు. ఆ వ్యక్తి విద్య​, కుటంబ వీసా కలిగి ఉన్నాడని విచారణలో తెలిసినట్లు పేర్కొన్నారు. 2013లో అతడు ఆస్ట్రేలియాను విడిచి వెళ్లాడని చెప్పారు.

బాంబుదాడికి పాల్పడిన మరో వ్యక్తి బ్రిటన్​లో 2006-07 మధ్య కాలంలో విద్యనభ్యసించినట్లు బ్రిటీష్ భద్రతా అధికారి తెలిపారు.

ఇదీ చూడండి:టార్గెట్​ అమెరికా: కిమ్​, పుతిన్​ స్నేహగీతం