'శ్రీలంకకు ఐసిస్​ నుంచి పొంచి ఉన్న ముప్పు'

ఈస్టర్​ రోజున జరిగిన బాంబు దాడులతో సంబంధాలున్న ఉగ్రవాదులు తమ పోలీసుల అదుపులో ఉన్నారని శ్రీలంక ప్రధాని విక్రమ సింఘే తెలిపారు. కొందరు ముష్కరులను భద్రతా దళాలు  హతమార్చాయని ప్రకటించారు. అయితే దేశానికి ఇంకా ఐసిస్​ నుంచి ఉగ్రదాడుల ముప్పు ఉందని తెలిపారు.

తమ దేశానికి ఇంకా ఐసిస్ నుంచి ఉగ్రదాడుల ముప్పు పొంచి ఉందన్నారు శ్రీలంక ప్రధానమంత్రి విక్రమ సింఘే. ఈస్టర్​ రోజున బాంబు దాడులకు తెగబడిన ఉగ్రవాదులను తమ పోలీసులు అదుపులోకి తీసుకున్నారని, కొందరిని హతమార్చారని తెలిపారు. దేశంలోని ప్రస్తుత భద్రతా పరిస్థితిపై పార్లమెంటులో చర్చ సందర్భంగా ఆయన ప్రసంగించారు.

ఐసిస్​ హస్తం

ఈస్టర్​ రోజున బాంబు దాడులకు తెగబడిన ముష్కరులకు ప్రత్యక్షంగా, పరోక్షంగా ఉగ్రసంస్థ ఐసిస్​తో సంబంధాలు ఉన్నట్టు దర్యాప్తులో తేలిందని చెప్పారు విక్రమ సింఘే. ఉగ్రవాదుల గురించిన సమాచారాన్ని త్వరగా తెలుసుకునేందుకు మరింత అధునాతన సాంకేతికతను అందిపుచ్చుకోవాల్సిన అవసరం ఉందని అభిప్రాయపడ్డారు. ప్రమాదం ఇంకా ముగియలేదని అన్నారు.

ఉగ్రవాద బాధిత దేశంగా శ్రీలంక మారిందని ఆవేదన వ్యక్తం చేశారు విక్రమ సింఘే. ఉగ్రవాదంపై పోరాడేందుకు ప్రపంచ దేశాలతో కలిసి పని చేస్తామన్నారు. అయితే వేరే దేశాల నుంచి బలగాలను మాత్రం దేశానికి తీసుకురాబోమని స్పష్టం చేశారు.

దేశం ఇప్పుడు సురక్షితంగా ఉందని, త్వరలో సాధారణ పరిస్థితులు నెలకొంటాయని సోమవారమే ప్రకటించారు శ్రీలంక త్రివిధ దళాధిపతులు, పోలీసు ఉన్నతాధికారులు. దాడులకు సంబంధించి ఇప్పటి వరకు 73 మందిని అదుపులోకి తీసుకున్నట్టు వారు వెల్లడించారు.

ఏప్రిల్​ 21న శ్రీలంకలో జరిగిన తొమ్మిది బాంబు పేలుళ్లలో దాదాపు 250 మంది మృతి చెందారు. 500మందికి పైగా గాయపడ్డారు.