ఆగస్టు 12న తొలి కరోనా వ్యాక్సిన్​ విడుదల!

కరోనా మహమ్మారి విజృంభిస్తున్న వేళ రష్యా శుభవార్త అందించింది. తొలి కొవిడ్​-19 వ్యాక్సిన్​ను ఆగస్టు 12 విడుదల చేయనున్నట్లు ప్రకటించింది. ప్రస్తుతం మూడో దశ ట్రయల్స్​ జరుగుతున్నట్లు వెల్లడించింది.

కరోనా మహమ్మారి వేగంగా విజృంభిస్తున్న నేపథ్యంలో యావత్​ ప్రపంచం వ్యాక్సిన్​ కోసం ఎదురుచూస్తోంది. ఆ దిశగా పలు దేశాల్లో పరిశోధనలు ముమ్మరంగా సాగుతున్నాయి. ఈ క్రమంలోనే ఆగస్టు 12న తొలి వ్యాక్సిన్​ను విడుదల చేయనున్నట్లు ప్రకటించింది రష్యా. ఈ టీకాను గమలేయా పరిశోధన సంస్థ, రష్యా రక్షణ శాఖ సంయుక్తంగా అభివృద్ధి చేస్తున్నాయి.

ప్రస్తుతం మూడో దశ ట్రయల్స్​లో ఉన్న టీకాను అందుబాటులోకి తేనున్నట్లు వెల్లడించారు ఆరోగ్య శాఖ సహాయ మంత్రి ఒలెగ్​ గ్రిడ్​నేవ్​.

" గమలేయా సంస్థ రూపొందించిన వ్యాక్సిన్​ ఆగస్టు 12న విడుదల చేయనున్నాం. ప్రస్తుతం చివరి, మూడోదశ క్లినికల్​ ట్రయల్స్​ జరుగుతున్నాయి. ట్రయల్స్​ చాలా ముఖ్యం. మొదట వైద్య నిపుణులు, వృద్ధులకు టీకా ఇవ్వనున్నాం."

- ఒలెగ్​ గ్రిడ్​నేవ్​, ఆరోగ్య శాఖ సహాయమంత్రి

గమలేయా రూపొందిస్తోన్న టీకా తొలి దశ క్లినికల్​ ట్రయల్స్​ జూన్​ 18న ప్రారంభమయ్యాయి. 38 మంది వలంటీర్లపై ప్రయోగించారు. వారందరిలో కరోనా ప్రతిరోధక శక్తి ఏర్పడినట్లు గుర్తించారు. జులై 15న తొలి బృందం, జులై 20న రెండో బృందం డిశ్చార్జి అయ్యారు.

ఇదీ చూడండి: కొవిడ్ నుంచి ఎలుకలను రక్షించిన మోడెర్నా టీకా