కాల్పుల్లో 9 మంది మృతి..!

న్యూజిలాండ్​లోని ఓ మసీదులో జరిగిన కాల్పుల నుంచి బంగ్లాదేశ్​ క్రికెటర్లు సురక్షితంగా బయటపడ్డారు. అయితే దుండగుడు జరిపిన కాల్పుల్లో 9 మంది మరణించినట్లు స్థానిక మీడియా చెబుతోంది.

న్యూజిలాండ్​ కైస్ట్​చర్చ్​ ప్రాంతంలోని ఓ మసీదులో ఓ దుండగుడు కాల్పులకు తెగబడ్డాడు. ఈ దుర్ఘటనలో 9 మంది మృతి చెందినట్లు స్థానిక మీడియా సమాచారం.

అయితే ఆ దేశంలో పర్యటిస్తోన్న బంగ్లాదేశ్ క్రికెట్​ జట్టు సురక్షితంగా బయటపడింది. కాల్పుల సమయంలో క్రికెటర్లు బస్సులోనే ఉండటం వల్ల పెద్ద ప్రమాదం తప్పిందని బంగ్లాదేశ్ క్రికెట్ బోర్డ్​ ప్రతినిధి జలాల్ యూనస్ తెలిపారు. శుక్రవారం ప్రార్థన నిమిత్తం క్రికెటర్లు మసీదుకు వెళ్లినట్లు జలాల్​ పేర్కొన్నారు. ఇకపై హోటల్​లో ఉండాలని ఆటగాళ్లను కోరినట్లు ఆయన తెలిపారు. ఇది భయపెట్టే అనుభవమని బంగ్లా క్రికెటర్ తమీమ్​ ఇక్బాల్ ట్వీట్​ చేశాడు.

అయితే దుండగుడి కాల్పుల్లో ఎంత మంది చనిపోయారు, క్షతగాత్రులయ్యారు అనే విషయం ఇంకా అధికారికంగా తెలియరాలేదు. పరారైన దుండగుడి కోసం పోలీసులు గాలిస్తున్నారు.