కరోనా కట్టడికి ప్రపంచవ్యాప్తంగా వ్యాక్సినేషన్ ప్రక్రియ జరుగుతోంది. కరోనా మూడో దశ వచ్చే అవకాశాలు ఉన్నాయన్న శాస్త్రవేత్తల హెచ్చరికలతో అన్ని దేశాలు అప్రమత్తమవుతున్నాయి. వీలైనంత వరకు ప్రజలందరికీ వ్యాక్సిన్‌ వేయించి కరోనా నుంచి వారిని రక్షించాలని ముమ్మర ప్రయత్నాలు చేస్తున్నాయి. ఈ క్రమంలో వ్యాక్సిన్‌ వేయించుకోవాలని ప్రజలకు ప్రభుత్వాలు, ప్రముఖులు విజ్ఞప్తి చేయడం, ప్రోత్సాహకాలు ఇవ్వడం మనం చూస్తున్నాం. అయితే, పాకిస్థాన్‌లో మాత్రం ప్రజలు వ్యాక్సిన్‌ వేసుకోకపోతే వారి ఫోన్లను బ్లాక్‌ చేస్తామని, ప్రభుత్వ ఉద్యోగులకు జీతాలు ఇవ్వమని హెచ్చరికలు జారీ అవుతున్నాయి.
పలు దేశాలతో పోలిస్తే పాకిస్థాన్‌లో వ్యాక్సినేషన్ చాలా నెమ్మదిగా సాగుతోంది. ఇప్పటి వరకు కోటి మందికిపైగా మొదటి డోసు కొవిడ్‌ టీకా తీసుకుంటే.. వ్యవధి ముగిసినా రెండో డోసుకు ప్రజలు విముఖత చూపుతున్నారు. దీంతో రెండో డోసు తీసుకున్న వారి సంఖ్య భారీగా పడిపోతోంది. వ్యాక్సిన్‌ వేసుకుంటే దుష్ప్రభావాలు ఉంటాయన్న వదంతులను నమ్మి ప్రజలు వ్యాక్సిన్‌ వేయించుకోవడానికి ముందుకు రావట్లేదట. ప్రభుత్వాలు వ్యాక్సినేషన్, వ్యాక్సిన్‌ ఉపయోగాలపై ఎన్ని అవగాహన కార్యక్రమాలు నిర్వహిస్తున్నా ప్రజలు వ్యాక్సిన్‌ వేయించుకోవడానికి వెనకడుగు వేస్తున్నారని అధికారులు చెబుతున్నారు. ముఖ్యంగా అధిక జనాభా ఉన్న రాష్ట్రాల్లో ఒకటైన పంజాబ్‌లో వ్యాక్సినేషన్ మందకొడిగా సాగుతున్నట్లు సమాచారం.
అందుకే పంజాబ్‌ ప్రభుత్వం ఇటీవల కఠిన నిర్ణయం తీసుకుంది. వ్యాక్సిన్‌ వేసుకోని వారి మొబైల్‌ ఫోన్‌ లేదా నెట్‌వర్క్‌ను బ్లాక్‌ చేయించాలని నిర్ణయించింది. 'మొదట్లో ఇది ప్రతిపాదన కిందే ఉన్నా.. వ్యాక్సిన్‌ వేయించుకోవడానికి ప్రజలు ఇష్టపడకపోవడం వల్లే దీనిని చట్టంగా తీసుకొస్తున్నాం. అయితే, ఈ చట్టాన్ని ఏ విధంగా అమలు చేయాలనే విషయాన్ని టెలికాం సంస్థలు నిర్ణయిస్తాయి' అని పంజాబ్‌ ఆరోగ్యశాఖ ప్రతినిధి హమ్మద్‌ రజా వెల్లడించారు.