హికికొమోరి: జపాన్​లో ఒంటరి పక్షుల వ్యథ

రోజువారీ జీవితం ఉరుకులు, పరుగుల మయం. నిత్యం అనేక మందితో మాటలు, ఇంకెందరితోనో పనులు సహజం. ప్రత్యక్షంగా కాకపోయినా సాంకేతికత సాయంతోనైనా సమాజంతో సంబంధాలుంటాయి. జపాన్​లో మాత్రం కొంతమంది​ ప్రజలు దీనికి భిన్నంగా జీవిస్తూ వార్తల్లో నిలుస్తున్నారు? అక్కడి పాలకులను, సామాజిక నిపుణులను ఆందోళనకు గురిచేస్తున్నారు. ఎందుకు?

సమాజంతో సంబంధం లేకుండా జీవించటం... ఇదేదో సినిమా కాన్సెప్ట్​లా ఉంది కదా! కానీ ప్రస్తుతం జపాన్​లో ఇది బాగా ప్రాముఖ్యం పొందిన జీవన శైలి. దీనికి అక్కడి ప్రజలు హికికోమోరి అనే పేరు పెట్టారు.

ప్రసుతం జపాన్​లో 40 నుంచి 60 ఏళ్ల మధ్య వయసున్న 6.13 లక్షల మంది హికికోమోరి అనుసరిస్తున్నట్లు ప్రభుత్వం శుక్రవారం విడుదల చేసిన సర్వే నివేదిక తెలిపింది. ఇందులో సగం మంది ఏడు సంవత్సరాల నుంచి సమాజానికి దూరంగా బతుకుతున్న వారే. సమాజానికి దూరంగా బతుకుతున్నవారిలో 75 శాతం పురుషులే కావటం విశేషం.

ఒంటరి పక్షులు...

హికికోమోరిలు... కనీసం ఆరు నెలలు కళాశాలకు, ఉద్యోగానికి, మరే పనికీ బయటకు వెళ్లరు. కుటుంబసభ్యులు మినహా ఎవరితోనూ మాట్లాడరు.

జపాన్​లో 2016లో ఇలాంటి సర్వేనే చేశారు. అప్పుడు 39 ఏళ్ల లోపు హికికోమోరి ప్రజల సంఖ్య 5.41 లక్షలు. ఇలాంటి ఒంటరి పక్షి జీవితానికి యువతే ఎక్కువ మొగ్గుచూపుతున్నారని అప్పుడు అంచనా వేశారు అక్కడి అధికారులు. ఈ ఏడాది సర్వేతో మధ్య వయస్కుల వారిలోనూ హికికోమోరి ధోరణి పెరిగినట్లు తేలింది.

జీవన శైలిపై పునరాలోచించాల్సిందే....

హికికోమోరిలు ఆర్థికంగా తల్లిదండ్రులపైనే ఆధారపడుతుంటారు. అలాంటి తల్లిదండ్రుల బాధ ఎవరికీ చెప్పుకోలేనిది. వృద్ధాప్యం మీద పడుతున్నా సంతానం కోసం కష్టపడి పని చేయాల్సిందే. అలాంటి వారికి కొన్ని స్వచ్ఛంద సంస్థలు సాయం చేస్తుంటాయి.

"పెద్దవారిలోనూ హికికోమోరి ధోరణి పెరుగుతోందని మేము ఎప్పుడో చెప్పాం. ఆ విషయాన్ని ప్రభుత్వ సర్వే ధ్రువీకరిస్తోంది.

జపాన్​ సమాజంలో బతకడం చాలా కష్టం. అధిక ఒత్తిడి, మరో ధ్యాస లేకుండా పనిచేయాల్సిన పరిస్థితితో ప్రజలు మానసికంగా ఇబ్బంది పడుతున్నారు. అందుకే ఇతరులను కలవడం కన్నా ఇంటికి పరిమితం కావడమే నయమని భావిస్తున్నారు.

మన దృష్టిలో ఆనంద జీవితం అంటే ఏంటో పునరాలోచించుకోవాల్సిన విషయాన్ని సర్వే గుర్తుచేస్తోంది."

-- రికా యుడా, స్వచ్ఛంద సంస్థ ప్రతినిధి