సోదరికి కిమ్​ డిమోషన్​- ఆమెకు భయపడ్డారా?

ఉత్తర కొరియాలో మంగళవారంతో ముగిసిన అధికార వర్కర్స్​ పార్టీ కాంగ్రెస్​లో.. అత్యంత కీలకమైన పొలిట్​బ్యూరో సభ్యుల పేర్లను ప్రకటించారు. ఇందులో అధ్యక్షుడు కిమ్​ సోదరి కిమ్​ యో జోంగ్​ పేరు లేకపోవడం తీవ్ర అనుమానాలకు దారితీస్తోంది. సోదరికి పెరుగుతున్న ఆదరణను తట్టుకోలేకే యోను కిమ్​ పక్కనపెట్టారని కొందరు భావిస్తున్నారు. విధాన వైఫల్యాల వల్ల యోను అధికార బాధ్యతల నుంచి తప్పించారని మరికొందరు విశ్వసిస్తున్నారు. మరి వీటిల్లో నిజమేది? కిమ్​ యో జోంగ్​ భవితవ్యం ఏంటి?

కిమ్​ యో జోంగ్​.. ఉత్తర కొరియా​ అధ్యక్షుడు కిమ్​ జోంగ్​ ఉన్​ సోదరి. గత కొన్నేళ్లుగా ఆ దేశ రాజకీయాల్లో క్రియాశీలకంగా ఉంటూ ప్రపంచ దేశల దృష్టిలో పడ్డారు యో. తన నీడను కూడా నమ్మని కిమ్​కు నమ్మిన బంటుగా అతి తక్కువకాలంలోనే ఇంతటి గుర్తింపు తెచ్చుకున్న యో... అనూహ్యంగా కనుమరుగయ్యారు. ప్రస్తుతం ఆమె ఎక్కడున్నారనే విషయం కూడా ఎవరికీ తెలియదు. మరి ఇందుకు కారణమేంటి? యో ప్రాముఖ్యాన్ని చూసి కిమ్​ తట్టుకోలేకపోయారా? తన పీఠానికే ఎసరుపడేడట్టు ఉందని భావించి పక్కనపెట్టారా?

ఎందుకీ మార్పు?

ఈ మధ్య కాలంలో కిమ్​ యో జోంగ్​కు ప్రాధాన్యం తగ్గిపోతోందని ఉత్తర కొరియా రాజకీయాలను పరిశీలించినవారు చెబుతున్నారు. విధాన వైఫల్యాల వల్ల యోను కిమ్​ పక్కనపెట్టారని కొందరు భావిస్తున్నారు. అయితే ఓవైపు తన హయాంలో దేశంలో ఉన్న ఆర్థిక సవాళ్లు.. మరోవైపు రాజకీయంగా యోకు పెరుగుతున్న ప్రాముఖ్యాన్ని చూసి ఆందోళన చెందిన కిమ్​.. ఆమెను అధికారానికి దూరంగా ఉంచుతున్నారని అనేక మంది విశ్వసిస్తున్నారు.

ఇప్పటికే కిమ్​ 'వారసురాలు' యో అని ఉత్తర కొరియాతో పాటు ప్రపంచ దేశాలు భావిస్తున్నాయి. ఈ తరుణంలో యోకు ఆదరణ పెరిగితే.. తన అధికారం, ఆరోగ్యంపై ప్రజల్లో అనుమానాలు పెరుగుతాయని.. ఫలితంగా ఇది తన పీఠానికే ముప్పు అని కిమ్​ అనుకుంటున్నట్టు దక్షిణ కొరియా విశ్లేషకులు అంచనా వేస్తున్నారు. అందుకే యోను అధికార బాధ్యతల నుంచి తప్పిస్తున్నారని చెబుతున్నారు. ఈ తరుణంలో కిమ్​ యో జోంగ్​ భవితవ్యం ప్రశ్నార్థకంగా మారింది.

ఇదీ చూడండి:-'మాటలు జాగ్రత్త'- కొరియాకు​ కిమ్​ సోదరి వార్నింగ్

పొలిట్​బ్యూరోలో లేని పేరు..

ఉత్తర కొరియాలో ఐదేళ్లలో తొలిసారిగా అధికార వర్కర్స్​ పార్టీ కాంగ్రెస్​ను నిర్వహించారు కిమ్. 8 రోజులు సాగిన ఈ సమావేశాలు మంగళవారంతో ముగిశాయి. ఈ నేపథ్యంలో ప్రభుత్వంలో అత్యంత కీలకమైన పొలిట్​బ్యూరో సభ్యుల పేర్లను ప్రకటించారు కిమ్​. ఇందులో కిమ్​ యో జోంగ్​ పేరు లేకపోవడం వల్ల ఈ పూర్తి వ్యవహారంపై అనుమానాలు తారస్థాయికి చేరాయి.

పొలిట్​బ్యూరో సభ్యులను ఉన్నతస్థాయి అధికారులుగా భావిస్తారు. వీరు కిమ్​తో అత్యంత సన్నిహితంగా ఉండి పనిచేస్తారు. దేశానికి సంబంధించిన కీలక నిర్ణయాలను ఈ పొలిట్​బ్యూరో సమావేశాల్లోనే తీసుకుంటారు కిమ్. గతంలో.. ప్రత్యామ్నాయ పొలిట్​బ్యూరో సభ్యురాలిగా యో విధులు నిర్వహించారు. ఈసారి పూర్తిస్థాయి కమిటీలో చోటు దక్కుతుందని అందరూ భావించారు. అయితే అనూహ్యంగా యో పేరు అటు ప్రత్యామ్నాయ పొలిట్​బ్యూరో.. ఇటు పూర్తిస్థాయి పొలిట్​బ్యూరో సభ్యుల జాబితాలో లేదు.

మరోవైపు.. దక్షిణ కొరియాపై తీవ్రస్థాయిలో విమర్శలు చేస్తూ బుధవారం ఓ ప్రకటనను విడుదల చేశారు కిమ్​ యో జోంగ్​. ఈ విషయాన్ని వెల్లడించిన ఉత్తర కొరియా అధికార మీడియా.. చివర్లో ఆమెను "వైస్​ డిపార్ట్​మెంట్​ డైరక్టర్​"గా సంబోధించింది. ఇది గతంలో ఆమెకున్న "ఫస్ట్​ వైస్​ డిపార్ట్​మెంట్​ డైరక్టర్​" బిరుదుకన్నా చాలా తక్కువ కావడం గమనార్హం.

ఇదీ చూడండి:-అధికార పార్టీ ప్రధాన కార్యదర్శిగా కిమ్​