కరోనా మహమ్మారి ధాటికి ప్రపంచమంతా లాక్డౌన్ అయిన నేపథ్యంలో ఎడ్యుకేషనల్ టెస్టింగ్ సర్వీస్ (ఈటీఎస్) కీలక నిర్ణయం తీసుకుంది. టోఫెల్, జీఆర్ఈ లాంటి ప్రపంచ స్థాయి పరీక్షలను... విద్యార్థులు ఇంటిలోనే ఉండి రాసే వీలు కల్పించింది. అయితే ఈ పరీక్షలు చైనా, ఇరాన్ దేశాల్లో నిర్వహించడం కుదరదని స్పష్టం చేసింది.
"కరోనా వైరస్ కారణంగా ప్రపంచవ్యాప్తంగా పరీక్షలు రాయలేకపోతున్న విద్యార్థులకు ఇప్పుడు ఓ పరిష్కారం లభిస్తుంది. పరీక్ష కేంద్రాల్లో టెస్ట్లు నిర్వహించడానికి అనుకూల పరిస్థితి ఏర్పడేంత వరకు టోఫెల్, జీఆర్ఈ పరీక్షలు ఇంట్లోనే రాసుకునేందుకు వీలు కల్పిస్తాం."
- శ్రీకాంత్ గోపాల్, టోఫెల్ ప్రోగ్రాం ఎగ్జిక్యూటివ్ డైరెక్టర్
పటిష్ఠ భద్రత నడుమ
ఇంటి వద్ద రాసే ఈ పరీక్షల చెల్లుబాటు, విశ్వసనీయత, భద్రత కోసం అత్యున్నత ప్రమాణాలకు అనుగుణంగా తగిన జాగ్రత్తలు తీసుకుంటున్నారు.
రియల్ టైమ్ హ్యూమన్ మానిటరింగ్, కృత్రిమ మేధ (ఆర్టిఫిషియల్ ఇంటెలిజెన్స్ టెక్నాలజీ) రెండింటినీ ఉపయోగించి భద్రతా వ్యవస్థ ఏర్పాటు చేస్తున్నట్లు శ్రీకాంత్ తెలిపారు.
కరోనా దెబ్బకు
టెస్ట్ ఆఫ్ ఇంగ్లిష్ ఫారిన్ లాంగ్వేజ్ (టోఫెల్), గ్రాడ్యుయేట్ రికార్డ్ ఎగ్జామినేషన్స్ (జీఆర్ఈ)... ప్రపంచవ్యాప్తంగా ఉన్న అత్యున్నత విశ్వవిద్యాలయాల్లో ప్రవేశార్హత కోసం నిర్వహించే పరీక్షలు. కరోనా వ్యాప్తి మొదలైన తరువాత ప్రపంచవ్యాప్తంగా ఈ పరీక్షలు నిలిచిపోయిన సంగతి తెలిసిందే.
ఇదీ చూడండి:దేశంలో పెరుగుతున్న కరోనా కేసులు- ఆగని మృత్యుఘోష
