అఫ్గానిస్థాన్ను ఆక్రమించి ప్రభుత్వాన్ని ఏర్పాటు చేసేందుకు సిద్ధమవుతున్న క్రమంలో కీలక వ్యాఖ్యలు చేశారు తాలిబన్లు. చైనా తమకు అత్యంత ముఖ్యమైన భాగస్వామిగా(taliban china connection) పేర్కొన్నారు. అఫ్గాన్(Afghan Taliban) పునర్నిర్మాణం కోసం, ఆర్థికంగా చితికిపోయి, ఆకలి కేకల్లో చిక్కుకున్న దేశాన్ని బయటపడేసేందుకు చైనా వైపు చూస్తున్నట్లు చెప్పారు.
చైనా వన్ బెల్ట్ ప్రాజెక్టుకు మద్దతు పలుకుతున్నట్లు చెప్పారు తాలిబన్ ప్రతినిధి జబిహుల్లా ముజాహిద్.
" చైనా మాకు అత్యంత ముఖ్యమైన భాగస్వామి. మా దేశాన్ని పునర్నిర్మించేందుకు, పెట్టుబడులు పెట్టేందుకు సిద్ధంగా ఉన్నందున మాకు గొప్ప అవకాశం. దేశంలో విలువైన కాపర్ గనులు ఉన్నాయి. వాటిని కృతజ్ఞతగా చైనాకు అందిస్తాం. ప్రపంచవ్యాప్తంగా ఉన్న మార్కెట్లకు చైనా మమ్మల్ని చేరవేస్తుంది."
- జబిహుల్లా ముజాహిద్, తాలిబన్ ప్రతినిధి.
రష్యాతోనూ సత్సంబంధాలు..
రష్యా సైతం తమకు ముఖ్యమైన భాగస్వామిగా పేర్కొన్నారు తాలిబన్ ప్రతినిధి జబిహుల్లా. భవిష్యత్తులో మాస్కోతో మంచి సంబంధాలు కొనసాగిస్తామని స్పష్టం చేశారు.
తాలిబన్లకు చైనా, రష్యా మద్దతు..
అఫ్గాన్ను ఆక్రమించిన తాలిబన్లకు చైనా, రష్యాలు మద్దతు తెలిపాయి. అఫ్గాన్ సార్వభౌమత్వాన్ని చైనా గౌరవిస్తుందని, వారి అంతర్గత విషయంలో కలుగజేసుకోబోమని, అఫ్గాన్ ప్రజల స్నేహాన్ని కొనసాగిస్తామని ఇటీవలే ప్రకటించారు చైనా విదేశాంగ శాఖ ప్రతినిధి వాంగ్ వెన్బిన్. రష్యా సైతం తాలిబన్లకు అనుకూలంగానే ప్రకటన చేసింది.
బీఆర్ఐ ప్రాజెక్ట్పై చైనా ఆశాభావం..
నౌకాశ్రయాలు, రైల్వే, రహదారులు, పారిశ్రామిక పార్కుల నెట్వర్క్ ద్వారా తమ దేశాన్ని.. ఆఫ్రికా, ఆసియా, యూరప్తో అనుసంధానించడానికి వేల కోట్ల రూపాయల బెల్ట్ అండ్ రోడ్ ప్రాజెక్టును(బీఆర్ఐ)ని చేపట్టింది చైనా. అఫ్గాన్లో తాలిబన్ల రాకతో అఫ్గాన్కు తమ ప్రాజెక్టును పొడగించేందుకు మార్గం సుగమమైనట్లు ఆశాభావం వ్యక్తం చేసింది. సీపెక్ ప్రాజెక్టులో భాగంగా పాకిస్థాన్, అఫ్గానిస్థాన్, చైనా దేశాలను కలుపుతూ ఈ ప్రాజెక్టు చేపట్టగా.. గతంలో ఘనీ ప్రభుత్వం దీనిని వ్యతిరేకించింది. పాక్లో తాలిబన్లకు ఆశ్రయం కల్పిస్తున్న నేపథ్యంలో అడ్డు చెప్పింది. తాజాగా చైనాకు అడ్డు తొలిగినట్లయింది.
ఇదీ చూడండి:Afghan news: అఫ్గాన్ సంపదపై డ్రాగన్‌ కన్ను.. తాలిబన్లతో మంతనాలు!
