ఆస్ట్రేలియా ప్రధాని స్కాట్ మోరిసన్ భారత పర్యటనను రద్దు చేసుకున్నారు. ఈ నెల 13 నుంచి నాలుగు రోజులపాటు ఆయన భారత్లో పర్యటించి, ప్రధాని నరేంద్ర మోదీతో ద్వైపాక్షిక చర్చలు జరపాల్సి ఉంది. అయితే స్వదేశంలో కార్చిచ్చు బీభత్సం సృష్టిస్తోన్న నేపథ్యంలో ఆయన భారత పర్యటనను రద్దు చేసుకున్నట్లు దౌత్యవర్గాలు తెలిపాయి.
మోరిసన్ తన పర్యటనలో భాగంగా విదేశాంగ మంత్రిత్వశాఖ నిర్వహిస్తోన్న రైసిన్ డైలాగ్లో ప్రసంగించవలసి ఉంది. దీని తరువాత మోరిసన్ ముంబయి, బెంగళూరులను కూడా సందర్శించాలనుకున్నారు.
కార్చిచ్చు బీభత్సం
ఆస్ట్రేలియాలోని న్యూసౌత్వేల్స్, విక్టోరియా రాష్ట్రాల్లో దావానలం ఇంకా వ్యాపిస్తూనే ఉంది. ఇప్పటి వరకు మంటలకు చిక్కి 20 మంది ప్రాణాలు కోల్పోయారు. సుమారు 500 ఇళ్లు దగ్ధమయ్యాయి. విక్టోరియాలోని మల్లకూట ప్రాంతంలో దాదాపు 3000 మంది పర్యటకులు సహా 4 వేల మంది చిక్కుకుపోయారు.
మోదీ పరామర్శ
ఇంతకు ముందు ప్రధాని మోదీ.. స్కాట్ మోరిసన్తో టెలిఫోన్లో సంభాషించారు. కార్చిచ్చు వల్ల ఏర్పడిన భారీ ప్రాణ, ఆస్తి నష్టంపై భారతీయులందరి తరఫున సంతాపం వ్యక్తం చేశారు. ఈ ప్రకృతి విపత్తును ధైర్యంగా ఎదుర్కొంటున్న ఆస్ట్రేలియా ప్రజలకు భారత్ మద్దతుగా నిలుస్తుందని భారత విదేశాంగశాఖ కూడా ప్రకటించింది.
ఇదీ చూడండి: గగన్యాన్ వ్యోమగాముల కోసం డీఆర్డీఓ ఆహారం!