ఈ సాహస బాలిక పేరు కమర్‌గుల్‌. వయసు 15-16 ఏళ్లు ఉంటుంది. ఆమె తండ్రి గ్రామపెద్ద. ప్రభుత్వానికి మద్దతుదారు. ఇది తాలిబన్లకు రుచించలేదు. అతన్ని చంపడానికి ఈ నెల 17న అర్ధరాత్రి ఉగ్రవాదులు వచ్చారు. ఒంటిగంట సమయంలో కమర్‌గుల్‌ ఇంటి తలుపు తట్టారు. వచ్చింది ఎవరో చూడడానికి కమర్‌ తల్లి తలుపు తీసింది. ఉగ్రవాదులని అర్థం చేసుకొని లోపలికి రాకుండా అడ్డుకోగా.. వారు ఆమెను కాల్చి చంపి లోపలికి ప్రవేశించారు. అనంతరం తండ్రినీ హతమార్చారు.
శివంగిలా దూకి..
తల్లిదండ్రులను తన కళ్లెదుటే ఉగ్రవాదులు కాల్చి చంపడం చూసి తట్టుకోలేకపోయిన కమర్‌ శివంగిలా దూకింది. ఇంట్లో ఉన్న ఏకే-47 తుపాకీ తీసుకుని ముగ్గురు ముష్కరులను కాల్చిపారేసింది. అంతటితో ఆగకుండా.. తనపై హతమార్చేందుకు యత్నించిన ఉగ్రవాదులతో గంట పాటు భీకరంగా పోరాడింది. ఆమె కాల్పుల ధాటికి పలువురు గాయపడ్డారు.