సైన్యం దాడిలో 94 మంది తాలిబన్లు హతం

అఫ్గానిస్థాన్​ హెల్మాండ్​ రాష్ట్రంలో ఆ దేశ భద్రతా దళాలు చేపట్టిన ప్రత్యేక ఆపరేషన్​లో 94 మంది తాలిబన్​, అల్​ఖైదా ఉగ్రవాదులు హతమయ్యారు. మరో 16 మంది గాయపడినట్లు ఆ దేశ రక్షణ శాఖ తెలిపింది. మరోవైపు.. భారత అధ్యక్షతన యూఎన్​ఎస్​సీలో నేడు జరిగే సమావేశంలో అఫ్గాన్​లో హింసపై చర్చించనున్నారు.

అఫ్గానిస్థాన్​లో తాలిబన్ల ఏరివేతకు ప్రత్యేక ఆపరేషన్లు చేపడుతున్నాయి ఆ దేశ భద్రతా దళాలు. హెల్మాండ్​ రాష్ట్రం, లష్కర్​ గాహ్​ నగరంలో తాజాగా చేపట్టిన ఆపరేషన్​లో 94 మంది తాలిబన్​, అల్​ఖైదా ఉగ్రవాదులు హతమయ్యారు. మరో 16 మందికి తీవ్ర గాయాలైనట్లు అఫ్గాన్​ రక్షణ మంత్రిత్వ శాఖ శుక్రవారం ప్రకటించింది. గత వారం హెల్మాండ్​ రాష్ట్ర రాజధానిలో తాలిబన్లు, బలగాల మధ్య భీకర పోరు జరిగినట్లు తెలిపింది.

తాజా ఆపరేషన్​లో తాలిబన్​ హెల్మాండ్​ రెడ్​ యూనిట్​ కమాండర్​ మవ్లావీ ముబారక్​ హతమైనట్లు ట్వీట్​ చేశారు అఫ్గాన్​ రక్షణ శాఖ ప్రతినిధి ఫవాద్​ అమాన్​.

అఫ్గాన్​ నుంచి అమెరికా, నాటో బలగాల ఉపసంహరణ నేపథ్యంలో తాలిబన్లు రెచ్చిపోతున్నారు. దేశంలోని కీలక ప్రాంతాలను స్వాధీనం చేసుకుంటున్నారు. ప్రభుత్వ, పోలీసు, ఆర్మీ అధికారుల బంధువులను అపహరించి హతమార్చుతున్నారు తాలిబన్లు.

2021 తొలి అర్ధభాగంలో 1,659 మంది పౌరులు మరణించారు. 3,254 మంది గాయపడ్డారు. అఫ్గాన్​ అధికారులపై దాడులు కొనసాగిస్తామని గత బుధవారం ప్రకటించాడు తాలిబన్​ ప్రతినిధి జబిహుల్లా ముజాహిద్​. రక్షణ శాఖ తాత్కాలిక మంత్రి బిస్మిల్లా మొహమ్మది ఇంటిపై కారు బాంబు దాడి తర్వాత ఈ ప్రకటన చేశాడు.

యూఎన్​ఎస్​సీలో చర్చ

ఐక్యరాజ్య సమితి భద్రతా మండలిలో భారత్ అధ్యక్షతన శుక్రవారం జరిగే సమావేశంలో అఫ్గాన్​లో హింసాత్మక ఘటనలపై చర్చించనున్నారు.

ఇదీ చూడండి:సైన్యం భీకర దాడులు- 375 మంది తాలిబన్లు హతం