ఐరాసలో ఇలా జరగడం 75ఏళ్లలో తొలిసారి!

ఈ ఏడాది సెప్టెంబర్​లో జరగాల్సిన ఐరాస సాధారణ సభపై కరోనా వైరస్​ ప్రభావం పడింది. సభకు ప్రపంచ స్థాయి అగ్రనేతలు హాజరుకాలేరని సభా అధ్యక్షుడు ముహమ్మద్​ బండే వెల్లడించారు. వారు ఏ విధంగా పాల్గొంటారనే దానిపై రెండు వారాల్లో స్పష్టతనివ్వనున్నట్టు పేర్కొన్నారు.

ఐక్యరాజ్యసమితి సాధారణ సభకు విశిష్ట ప్రాముఖ్యత ఉంది. ఇదే వేదికగా ప్రపంచ నేతలు ఎన్నో చారిత్రక ప్రసంగాలు చేశారు. ఎన్నో కీలక చర్చలు జరిపారు. కానీ కరోనా మహమ్మారి వల్ల పరిస్థితులు పూర్తిగా మారిపోయాయి. ఈ ఏడాది సెప్టెంబర్​లో న్యూయార్క్​ వేదికగా జరగనున్న సాధారణ సభ వార్షిక సమావేశానికి ప్రపంచ స్థాయి నేతలు హాజరుకాలేరు. ఈ విషయాన్ని సభ అధ్యక్షుడు తిజ్జాని ముహమ్మద్​ బండే తెలిపారు.

"ఈ పరిస్థితుల్లో ప్రపంచ స్థాయి నేతలు న్యూయార్క్​కు రాలేరు. ఎందుకంటే అధ్యక్షుడు ఒక్కరే ప్రయాణం చెయ్యరు. అధ్యక్షుడితో పాటు పెద్ద సంఖ్యలో బృందాలు కూడా వస్తాయి. ఈ పరిస్థితుల్లో ఇలా జరగకూడదు. అందువల్ల వారు ఒక్కరే, వ్యక్తిగతంగా హాజరు కావడం కష్టం. 74ఏళ్లుగా జరగనిది ఈసారి జరుగుతుంది."

-- ముహమ్మద్​-బండే.

అయితే 193 అగ్రనేతలు ఏ విధంగా ప్రసంగిస్తారనే విషయంపై మరో రెండు వారాల్లో స్పష్టతనిస్తామని వెల్లడించారు ముహమ్మద్​. స్థానిక, ప్రపంచ స్థాయి సమస్యలను వారు ప్రస్తావిస్తారని పేర్కొన్నారు.

సెప్టెంబర్​లో ఐరాస సాధారణ సభ జరగాల్సి ఉంది. అప్పటికల్లా కనీసం కొన్ని వందల మంది సభ ఛాంబర్​లోకి చేరుకునే పరిస్థితులు ఉంటాయని ఆశాభావం వ్యక్తం చేశారు ముహమ్మద్​.

75వ వార్షికోత్సవం...

1945లో ఐరాసను స్థాపించారు. అంటే ఈ ఏడాదికి 75 ఏళ్లు నిండుతాయి. తొలుత ఈ 75వ వార్షికోత్సవాన్ని ఘనంగా నిర్వహించాలనుకున్నారు. కానీ కరోనా వైరస్​.. ప్రణాళికను పూర్తిగా మార్చేసింది. అయితే ఈ వార్షికోత్సవాలు వివిధ రూపాల్లో జరుగుతాయని సాధారణ సభ అధ్యక్షుడు పేర్కొన్నారు. ఇవి ఈ నెల 26 నుంచి ప్రారంభమవుతాయన్నారు.