భారత్-అమెరికా సంబంధాల బలోపేతానికి తమ ప్రభుత్వం అధిక ప్రాధాన్యమిస్తుందని అమెరికా అధ్యక్ష ఎన్నికల్లో డెమోక్రటిక్ పార్టీ అభ్యర్థి జో బైడెన్ ప్రచారబృందం తెలిపింది. బాధ్యతాయుత భాగస్వాములుగా వ్యవహరించనంతవరకు.. ఉమ్మడిగా ఎదుర్కొంటున్న ప్రపంచ సమస్యలు పరిష్కారం కావని అభిప్రాయపడింది. ఈ మేరకు ఇండో-అమెరికన్లపై ప్రత్యేక విధాన పత్రాన్ని విడుదల చేసిన ఆయన ప్రచార బృందం.. దక్షిణాసియాలోని ఉగ్రవాదాన్ని బైడెన్ సహించబోరని పేర్కొంది. ఇండో-పసిఫిక్‌ ప్రాంతంలో చైనా సహా మరే దేశం ఇతర దేశాలను బెదిరించకుండా.. స్థిరత్వం కోసం భారత్‌తో కలిసి పనిచేస్తామని చెప్పింది.
ఉగ్రవాదానికి వ్యతిరేకంగా పోరాడేందుకు భారత రక్షణ సామర్థ్యాన్ని బలోపేతం చేసే అంశంపై..... కలిసి పనిచేస్తామని తెలిపింది. ఆరోగ్య వ్యవస్థను మెరుగుపర్చడం సహా ఉన్నత విద్య, అంతరిక్షరంగం వంటి అంశాల్లో సంబంధాలను కొనసాగిస్తామని పేర్కొంది.