కరోనాపై పోరులో వ్యాక్సిన్ కోసం వెయ్యి కళ్లతో ఎదురుచూస్తున్న ప్రపంచ దేశాలకు ఇప్పట్లో ఆ తీపికబురు అందేలా కనిపించడం లేదు. వచ్చే ఏడాది చివరి నాటికి వ్యాక్సిన్ను కనుగొనే అవకాశముందని ప్రపంచ ఆరోగ్య సంస్థ (డబ్ల్యూహెచ్ఓ) ఆశాభావం వ్యక్తం చేసింది. అయితే అప్పటికి 2 బిలియన్లకుపైగా డోసులు అందుబాటులోకి వస్తాయని ఆశాభావం వ్యక్తం చేశారు డబ్ల్యూహెచ్ఓ చీఫ్ సైంటిస్ట్ సౌమ్య స్వామినాథన్.
వ్యాక్సిన్ కోసం ప్రస్తుతం అనేక మంది పరిశోధనలు చేస్తున్నారని... వచ్చే ఏడాది చివరి నాటికి వాటిల్లో కొన్ని అయినా సత్ఫలితాల్ని ఇస్తాయని సౌమ్య స్వామినాథన్ అభిప్రాయపడ్డారు.
పంపిణీపై...
వ్యాక్సిన్ అందుబాటులోకి వచ్చినప్పటికీ... ప్రపంచ దేశాలకు దానిని పంపిణీ చేయడం మరో అతిపెద్ద సమస్య. ఈ వ్యవహారంపై స్పందించిన స్వామినాథన్.. అధిక ప్రమాదం పొంచి ఉన్నవారికి మొదట వ్యాక్సిన్ను అందించే విధంగా డబ్ల్యూహెచ్ఓ ప్రతిపాదిస్తుందని స్పష్టం చేశారు. దీని ప్రకారం.. వృద్ధులు, డయాబెటిస్- శ్వాస సంబంధిత వ్యాధులు ఉన్నవారు, ఉద్యోగులకు ఈ వ్యాక్సిన్ తొలుత అందుతుంది.
అయితే ప్రపంచవ్యాప్తంగా వ్యాక్సిన్ పంపిణీపై ఇంకా ఎలాంటి ప్రణాళికలు లేవని పేర్కొన్నారు డబ్ల్యూహెచ్ఓ చీఫ్ సైంటిస్ట్. డబ్ల్యూహెచ్ ప్రణాళిక రూపొందిస్తుందని వెల్లడించారు. కానీ దీనికి ప్రపంచ దేశాలు కట్టుబడి ఉండాలని అభిప్రాయపడ్డారు.
బ్రిటన్, ఫ్రాన్స్, నెదర్లాండ్స్, జర్మనీ, అమెరికా వంటి అభివృద్ధి చెందిన దేశాలు.. వ్యాక్సిన్లు తొలుత తమ పౌరులకే అందే విధంగా ఇప్పటికే ఫార్మా సంస్థలతో ఒప్పందం చేసుకున్నాయి.
