'కశ్మీర్'​పై అమెరికా ఎంపీల ఆవేదన- ట్రంప్​కు లేఖ

పలువురు అమెరికా చట్టసభ్యులు కశ్మీర్​లో పరిస్థితులపై ఆవేదన వ్యక్తం చేశారు. కశ్మీర్​లో టెలికాం సేవలను పునరుద్ధరించడానికి భారత్​పై ఒత్తిడి తీసుకురావాలని కోరుతూ ట్రంప్​కు లేఖ రాశారు.

జమ్ముకశ్మీర్​ ప్రజల హక్కుల పరిరక్షణకు చొరవ చూపాలని అమెరికా అధ్యక్షుడు డొనాల్డ్ ట్రంప్​ను ఆ దేశ చట్టసభ్యులు కొందరు కోరారు. కశ్మీర్​లో టెలికాం సేవలపై ఉన్న ఆంక్షలను పూర్తిగా తొలగించి.. ఆర్టికల్​ 370 రద్దు అనంతరం నిర్బంధించిన ప్రజలను విడుదల చేసే దిశగా భారత్​పై ఒత్తిడి తీసుకురావాలని ట్రంప్​ను అభ్యర్థించారు.

కశ్మీర్​లో పరిస్థితులు రోజురోజుకు ఉద్రిక్తంగా మారుతున్నాయని సెనేటర్​ క్రిస్​ వాన్​ హోల్లెన్​, టాడ్ యంగ్​, బెన్​ కార్డిన్​, లిండ్సే గ్రాహమ్​ లేఖలో పేర్కొన్నారు.

జమ్ముకశ్మీర్​కు స్వయం ప్రతిపత్తి కల్పించే ఆర్టికల్​ 370 రద్దుతో దశాబ్దాలుగా ఉన్న విధానాల్లో భారీ మార్పులు జరిగాయని మరో సెనేటర్​ బాబ్​ కాసీ అభిప్రాయపడ్డారు. దీని వల్ల భారత్​-పాక్​ మధ్య ఉన్న విభేదాలు మరింత పెరుగుతాయన్నారు.

తన భూభాగంలో కార్యకలాపాలను సాగిస్తున్న ఉగ్రవాదులను పాకిస్థాన్​ అంతం చేయాలని లేఖలో పేర్కొన్నారు చట్టసభ్యులు. కశ్మీర్​ లక్ష్యంగా అలజడులు సృష్టించడానికి ప్రయత్నిస్తున్న వారిపైనా పాక్​ కఠిన చర్యలు చేపట్టాలని డిమాండ్​ చేశారు.

జమ్ముకశ్మీర్​... తమ అంతర్గత వ్యవహారమని, మూడో పక్షం జోక్యానికి తావు లేదని భారత్​ ఇప్పటికి అనేకసార్లు స్పష్టంచేసింది. ఇదే విషయాన్ని ప్రధాని నరేంద్రమోదీ డొనాల్డ్ ట్రంప్​కు నేరుగా చెప్పారు.

ఇదీ చూడండి:- 'కశ్మీర్ మా అంతర్గత విషయం..పాక్ జోక్యం అనవసరం'​