డబ్ల్యూటీఓతో అధిక లబ్ధి అగ్రదేశాలదే!

ఎగుమతులు, ఉత్పత్తి ఎక్కువగా ఉన్న దేశాలకే ప్రపంచ వాణిజ్య సంస్థ (డబ్ల్యూటీఓ) సభ్యత్వం ద్వారా అధిక లాభం కలిగిందని ఓ పరిశోధన తెలిపింది. 25ఏళ్ల ముందు సభ్యత్వం పొందిన అమెరికా.. 87 బిలియన్​ డాలర్లు లబ్ధిపొందగా.. 2001లో చేరిన చైనా.. 86 బిలియన్​ డాలర్లు లాభపడిందని నివేదిక వెల్లడించింది.

ప్రపంచ వాణిజ్య సంస్థ(డబ్ల్యూటీఓ) సభ్యత్వంతో అమెరికా, చైనా దేశాలు భారీగా లబ్ధిపొందినట్టు బెర్టెల్స్​మన్​ ఫౌండేషన్ సంస్థ పరిశోధనలో తేలింది​. డబ్ల్యూటీఓ సభ్యత్వం వల్ల అమెరికా స్థూల దేశీయోత్పత్తి(జీడీపీ) 87 బిలియన్​ డాలర్లు పెరిగిందని తెలిపింది. డబ్ల్యూటీఓలో అమెరికాకు 25ఏళ్లుగా సభ్యత్వం ఉంది.

2001లో డబ్ల్యూటీఓలో చేరిన చైనా.. వృద్ధిలో 86 బిలియన్​ డాలర్లు లబ్ధి పొందింది. జర్మనీ 66 బిలియన్​ డాలర్లతో ఆ తర్వాతి స్థానంలో నిలిచింది.

డబ్ల్యూటీఓను స్థాపించి రేపటితో(జనవరి 1)తో 25ఏళ్లు పూర్తవుతాయి. ప్రస్తుతం ఈ సంస్థలో 164 సభ్య దేశాలు ఉన్నాయి.

"ప్రపంచవ్యాప్తంగా.. డబ్ల్యూటీఓ సభ్య దేశాల జీడీపీ సగటున 4.5శాతం పెరిగింది. 1980-2016 మధ్యకాలంలో వారి ఎగుమతులు 14శాతం మేర పెరిగాయి. సభ్యత్వం లేని దేశాల ఎగుమతులు 6శాతం క్షీణించాయి. ఎగుమతులు, ఉత్పత్తులు గరిష్ఠంగా ఉన్న దేశాలే ఎక్కువ లాభం పొందాయి."
--- బెర్టెల్స్​మన్​ ఫౌండేషన్​.

తక్కువ ఉత్పత్తి పరిశ్రమలున్న ఐరోపా దేశాలు.. డబ్ల్యూటీఓ సభ్యత్వంతో పెద్దగా లబ్ధి పొందలేదని నివేదిక పేర్కొంది. ఫ్రాన్స్​ 25 బిలియన్లు, బ్రిటన్​ 22 బిలియన్లు లాభం పొందినట్టు స్పష్టం చేసింది.

ఇదీ చూడండి:- భారత్​లోని సొంతూరుకు వచ్చిన ఐర్లాండ్ ప్రధాని