ఉత్తర కొరియాపై కొత్త ఆంక్షలు అవసరం లేదు ఉత్తర కొరియాపై మరిన్ని కొత్త ఆంక్షలు విధించాల్సిన అవసరం లేదని అమెరికా అధ్యక్షుడు డొనాల్డ్ ట్రంప్ అభిప్రాయపడ్డారు. ఇప్పటికే ఉత్తర కొరియా చాలా సమస్యలు ఎదుర్కొంటున్నందున కొత్త ఆంక్షలు విధించడాన్ని ఆపేస్తున్నామని స్పష్టం చేశారు. ఉత్తర కొరియా అధ్యక్షుడు కిమ్ జోంగ్ ఉన్ తో స్నేహానికి తాము ఎంతో ప్రాముఖ్యత ఇస్తున్నామని తెలిపారు. "ఉత్తర కొరియా ప్రజలు ఎంతో బాధపడుతున్నారు. ఎంతో కాలంగా కష్టాల్లో జీవిస్తున్నారు. ఈ సమయంలో ఈ దేశంపై నూతన ఆంక్షలు అవసరం లేదనుకుంటున్నా. దీని ఉద్దేశం భవిష్యత్తులో ఆంక్షలు విధిస్తామని కాదు. నేను, కిమ్ జోంగ్ ఉన్ ఒకరినొకరు బాగా అర్థం చేసుకున్నాం. ఉత్తర కొరియాతో వీలైనంత వరకు సత్సంబంధాలు కొనసాగించటం ఎంతో ముఖ్యమని భావిస్తున్నా. "
-డొనాల్డ్ ట్రంప్, అమెరికా అధ్యక్షుడు
ఉత్తర కొరియాపై మరిన్ని ఆంక్షలు విధించే దిశగా అడుగులేస్తున్నామని గతవారమే ట్రంప్ ట్వీట్ చేశారు. ఇప్పుడు మళ్లీ మనసు మార్చుకున్నారు. ఎలాంటి ఆంక్షలు విధించబోమని ప్రకటించారు. ఈ నిర్ణయం అందరినీ ఆశ్చర్యానికి గురిచేసింది.
