పాక్​కు షాక్​- 'మధ్యవర్తిత్వం'పై ట్రంప్​ వెనకడుగు

కశ్మీర్​ సమస్య పరిష్కారానికి తాను మధ్యవర్తిత్వం చేస్తానన్న ఆఫర్​ను ట్రంప్​ వెనక్కి తీసుకున్నారు. ఈ విషయంపై భారత్​ సుముఖంగా లేకపోవడమే ఇందుకు కారణమని అగ్రరాజ్యంలోని భారత రాయబారి వెల్లడించారు.

కశ్మీర్​ సమస్యపై మధ్యవర్తిత్వం చేయడానికి సిద్ధంగా ఉన్నట్టు అమెరికా అధ్యక్షుడు డొనాల్డ్​ ట్రంప్​ చేసిన వ్యాఖ్యలు తీవ్ర దుమారం రేపాయి. ఇప్పుడు ఆ ఆఫర్​ను ట్రంప్​ ఉపసంహరించుకున్నారు. ఇకపై కశ్మీర్​కు సంబంధించిన మధ్యవర్తిత్వం అంశం ప్రస్తావనే ఉండబోదని స్పష్టంచేశారు. ఈ విషయాన్ని అమెరికాలోని భారత రాయబారి హర్ష వర్ధన్​ ష్రింగ్లా వెల్లడించారు.

కశ్మీర్​ అంశంపై ఏనాడూ అమెరికా మధ్యవర్తిత్వం వహించలేదని, సమస్యలను పరిష్కరించే దిశగా భారత్​-పాకిస్థాన్​ను ప్రోత్సహించడమే అగ్రరాజ్య విధానమని ష్రింగ్లా తెలిపారు.

"భారత్​-పాక్​ అంగీకరిస్తేనే కశ్మీర్​ సమస్యను పరిష్కరించడానికి మధ్యవర్తిగా ఉంటానని ట్రంప్​ స్పష్టం చేశారు. ఈ ఆఫర్​ను భారత్ అంగీకరించకపోవడం వల్ల మధ్యవర్తిత్వం చేసే యోచనను ట్రంప్​ ఉపసంహరించుకున్నారు."
- హర్ష వర్ధన్​ ష్రింగ్లా, అమెరికాలోని భారత రాయబారి

ట్రంప్​ వ్యాఖ్యలతో తీవ్ర దుమారం...

జులైలో పాకిస్థాన్​ ప్రధాని ఇమ్రాన్​ ఖాన్​ అమెరికాలో పర్యటించారు. పాక్​ ప్రధానితో సమావేశమైన అనంతరం.. కశ్మీర్​ సమస్య పరిష్కారానికి మధ్యవర్తిత్వం వహించడానికి సిద్ధంగా ఉన్నట్టు ట్రంప్​ ప్రకటించారు. భారత ప్రధాని నరేంద్ర మోదీ కూడా ఈ విషయంపై సానుకూలంగా స్పందించారని ట్రంప్​ అన్నారు. ట్రంప్​ వ్యాఖ్యలను ఇమ్రాన్​ స్వాగతించారు. అగ్రరాజ్య అధ్యక్షుడి ప్రకటనను భారత్​ ఖండించింది. కానీ అప్పటికే భారత్​లో ఈ అంశంపై తీవ్ర దుమారం రేగింది. ప్రధాని జవాబు చెప్పాలని పార్లమెంట్​లో విపక్షాలు నిరసనలు చేపట్టాయి.

ఇదీ చదవండి:- 'ద్వైపాక్షిక చర్చలతో కశ్మీర్​కు​ పరిష్కారం రాదు'