ఫ్లోరిడా నావల్​ బేస్​లో కాల్పుల కలకలం.. నలుగురు మృతి

అమెరికా ఫ్లోరిడా నావల్​ బేస్​లో జరిగిన కాల్పుల ఘటనలో మొత్తం నలుగురు మృతి చెందారు. 8మంది గాయపడ్డారు. ఘటనపై అధ్యక్షుడు డొనాల్డ్​ ట్రంప్ విచారం వ్యక్తం చేశారు.

అమెరికాలో మరోసారి కాల్పులు కలకలం సృష్టించాయి. ఫ్లోరిడా నావల్ బేస్‌లో సౌదీ అరేబియా ఎయిర్‌ఫోర్స్‌కు చెందిన అధికారి జరిపిన కాల్పుల్లో ముగ్గురు ప్రాణాలు కోల్పోయారు. పెన్సకోలా నావల్‌ఎయిర్‌స్టేషన్‌లోని ఓ తరగతి గదిలోకి తుపాకీతో ప్రవేశించిన సౌదీ అధికారి కాల్పులకు తెగబడ్డాడు. ఈ ఘటనలో ముగ్గురు మరణించగా.. 8 మంది గాయపడ్డారు. నావల్‌బేస్ అధికారులు జరిపిన ఎదురు కాల్పుల్లో సౌదీ అధికారి చనిపోయాడు. కాల్పుల ఘటన నేపథ్యంలో నావల్ బేస్‌ను తాత్కాలికంగా మూసివేశారు.

ప్రపంచ దేశాల సైనికులు..

ప్రపంచదేశాలకు చెందిన సైనికులు పెన్సకోలా నావల్ ఎయిర్‌స్టేషన్‌లో విమానశిక్షణ కోసం హాజరయ్యారు. ఈ సందర్భంగా శిక్షణ కోసం వచ్చిన సౌదీ అరేబియా ఎయిర్‌ఫోర్స్ అధికారి కాల్పులకు తెగబడ్డాడు. కాల్పుల వెనుక తీవ్రవాద కారణాలేమైనా ఉన్నాయా అనే కోణంలో దర్యాప్తు జరుపుతున్నట్లు అధికారులు తెలిపారు.

ట్రంప్​ విచారం

ఫ్లోరిడా నావల్ బేస్​లో కాల్పుల ఘటనపై అమెరికా అధ్యక్షుడు డొనాల్డ్​ ట్రంప్ విచారం వ్యక్తం చేశారు. సౌదీ యువరాజు సల్మాన్​ తనకు ఫోన్ చేశారని ట్వీట్ చేశారు. ఘటనలో మరణించిన, గాయపడిన వారి కుటంబ సభ్యులకు యువరాజు సంతాపం తెలిపారని పేర్కొన్నారు.
ఈ అనాగరిక చర్యపై సౌదీ ప్రజలు కోపంగా ఉన్నారని యువరాజు సల్మాన్​ తనతో చెప్పారని ట్వీట్​లో చెప్పారు ట్రంప్. అమెరికన్ల పట్ల సౌదీ ప్రజలకు ఉన్న ప్రైమానురాగాలను ఈ ఘటనకు పాల్పడిన వ్యక్తి ప్రభావితం చేయలేడని యువరాజు స్పష్టం చేశారన్నారు.

వారంలో రెండోసారి

అమెరికా నావల్ బేస్‌లలో కాల్పులు జరగడం ఈ వారంలో ఇది రెండోసారి. పెరల్‌హార్బర్‌లో రెండు రోజుల క్రితం జరిగిన కాల్పుల ఘటన మరువక ముందే ఫ్లోరిడా నావల్ బేస్‌లో కాల్పులు కలకలం సృష్టించాయి.

ఇదీ చూడండి: అమెరికా, చైనా మధ్య మరో వివాదం- ట్రేడ్​ డీల్ దారెటు?