స్కూళ్లు రీఓపెన్- 750 మంది విద్యార్థులు, సిబ్బందికి కరోనా

ప్రపంచంపై కరోనా మహమ్మారి తన పంజా విసురుతూనే ఉంది. అమెరికాలో ఆ ప్రభావం ఎక్కువగానే ఉంది. ఇటీవలే టెనిసీ రాష్ట్రంలో పాఠశాలలను పునఃప్రారంభించగా.. భారీగా కేసులు నమోదవుతున్నాయి. వందల మంది విద్యార్థులు, సిబ్బంది కరోనా బారినపడతున్నారు.

అమెరికాలో కొవిడ్​ విజృంభణ కొనసాగుతూనే ఉంది. కరోనా వ్యాప్తి ఎక్కువగా ఉన్నా విద్యా సంస్థలు ప్రారంభయ్యాయి. ఈ నేపథ్యంలో వందల మంది విద్యార్థులు, సిబ్బంది కరోనా బారిన పడుతున్నారు. బుధవారం నాటికి ఒక్క టెనిసీ రాష్ట్రంలోనే దాదాపు 750 మందికి కరోనా పాజిటివ్​ వచ్చినట్లు అధికారులు వెల్లడించారు.

ఈ రాష్ట్రంలోని దాదాపు సగం జిల్లాల్లో కరోనా కేసులు నమోదయ్యాయి. ప్రస్తుతం కేసులను గుర్తించే పనిలో ఉన్నామని.. సెప్టెంబర్​ 22 నాటికి పూర్తి స్థాయి వివరాలు సేకరిస్తామని అధికారులు స్పష్టం చేశారు.

తగ్గిన కేసులు..

అమెరికాలో గత వారం రోజులుగా నిత్యం 40 వేలలోపు కొత్త కేసులు నమోదవుతున్నాయి. బుధవారం మరో 35 వేల మంది వైరస్​ బారినపడ్డారు. మొత్తం కేసుల సంఖ్య 65 లక్షలు దాటగా.. మరణాల సంఖ్య 1.95 లక్షలకు చేరింది.