రాజీ: సుంకాల మోతకు, అక్రమ వలసలకు బ్రేక్​

మెక్సికో నుంచి అగ్రరాజ్యానికి వచ్చే వస్తువులపై సుంకాల పెంపు ఆలోచనను విరమించుకున్నట్లు తెలిపారు అమెరికా అధ్యక్షుడు డొనాల్డ్​ ట్రంప్​. అక్రమ వలసల నియంత్రణకు మెక్సికో అంగీకరించినందు వల్లే ఈ నిర్ణయం తీసుకున్నట్లు ట్వీట్​ చేశారు​.

అక్రమ వలసల నియంత్రణపై మెక్సికోతో ఒప్పందం కుదిరిందని తెలిపారు అమెరికా అధ్యక్షుడు డొనాల్డ్​ ట్రంప్​. అగ్రరాజ్యానికి మెక్సికో నుంచి వచ్చే వస్తువులపై సుంకాలు పెంచబోమని చెప్పారు. ఈ విషయాన్ని ట్విట్టర్​లో వెల్లడించారు.

"మెక్సికోతో అమెరికా అధికారిక ఒప్పందం కుదుర్చుకుంది. సోమవారం నుంచి ఆ దేశ వస్తువులపై విధించాలనుకున్న సంకాల పెంపును విరమించుకుంటున్నాం. అమెరికా దక్షిణ సరిహద్దు ద్వారా వలసలను నియంత్రించేందుకు మెక్సికో చర్యలు చేపడతామని తెలిపింది. అక్రమ వలసల కట్టడికి ఇది దోహదపడుతుంది. ఒప్పందానికి సంబంధించిన మరిన్ని వివరాలు త్వరలోనే తెలియజేస్తాం. "
-డొనాల్డ్​ ట్రంప్ ట్వీట్​.

అమెరికాకు మెక్సికో నుంచి అక్రమ వలసలను నియంత్రించకపోతే ఆ దేశ వస్తువులపై సోమవారం నుంచి 5 శాతం సుంకాలను పెంచుతామని ఇది వరకే ప్రకటించారు ట్రంప్. సుంకాల పెంపు ప్రతినెలా పెరుగుతూ 25 శాతం వరకు చేరుకోవచ్చని హెచ్చరించారు. చివరకు... మెక్సికో దిగొచ్చింది.

ఇదీ చూడండి: దొంగను పట్టుకోవడానికి వెళితే జింక దొరికింది..!